Como parti di su mision comercial na Santo Domingo den cuadro di HUB Camara Santo Domingo 2026, Minister di Finansa, Asuntonan Economico y Sector Primario, Geoffrey Wever, a sostene un reunion strategico enfoca riba fortalecemento di relacion entre Aruba y sector agroempresarial di Republica Dominicana.
E reunion a concentra riba con Junta Agroempresarial Dominicana (JAD) por cumpli un papel importante entre productor y empresanan exportador Dominicano y mercado Arubano, cu e meta di crea un cooperacion comercial mas structural, resiliente y mutuamente beneficioso.
Pa Minister Wever, diversificacion di fuentenan di abastecemento ta un prioridad importante pa Aruba. Como un economia chikito y altamente dependiente riba importacion, Aruba mester amplia e cantidad di mercado y proveedor cu por sostene nos seguridad alimentario y reduci vulnerabilidad den cadena di suministro.
Durante e reunion, a discuti riba e sectornan y gruponan di producto Dominicano cu tin e mayor potencial strategico pa mercado Arubano, specialmente productonan cu ya ta cumpli cu standardnan internacional y cu tin capacidad di exportacion.
E rol di JAD ta bira importante den e proceso ey, pasobra e institucion por yuda identifica e productornan y empresanan cu realmente ta prepara pa exporta y facilita un conexion mas directo entre oferta Dominicano y demanda na Aruba.
Un otro tema central tabata acceso na mercado. Pa producto agricola y carni, ta esencial pa e condicionnan sanitario y fitosanitario ta claro, confiabel y cumplibel. E coordinacion tecnico relaciona cu esaki mester keda den man di e autoridadnan competente, mientras e nivel politico y comercial por crea e cuadro pa facilita cooperacion y progreso.
“Nos mester crea claridad. Empresarionan mester sa cua condicionnan mester cumpli, cua documentacion ta necesario y cua mercado ta realmente habri. Ora e reglanan ta claro y e coordinacion ta bon, oportunidad comercial por move mas rapido y cu mas siguransa,” Minister Wever a enfatisa.
Logistica a forma un parti importante di e conversacion. Actualmente, e conexion maritimo entre Republica Dominicana y Aruba ta wordo opera pa Don Andres, cu ta bishita Aruba un biaha pa siman via Corsou. Pa crea un relacion di abastecemento mas structural, factor manera cargo-consolidacion, disponibilidad di reefer-capaciteit y previsibilidad di entrega ta crucial, especialmente pa producto alimenticio, agricola y carni.
Minister Wever a indica cu e reunion ta conecta directamente cu e otro encuentronan strategico cu el a tene durante HUB Camara Santo Domingo 2026.
Mientras un reunion anterior a enfoca riba posibilidad pa importa carni y crea suficiente volumen comercial, otro reunionnan cu autoridadnan di aviacion y puerto a trata conectividad aereo, conectividad maritimo, capacidad, frecuencia y logistica. E reunion cu JAD agrega e componente di produccion, acceso na mercado y articulacion cu sector agroempresarial.
“Nos ta traha riba henter e cadena. Nos ta conecta productor cu mercado, mercado cu transporte, transporte cu regulacion y tur esaki cu e necesidadnan di Aruba. Ta asina un oportunidad comercial por bira un relacion di abastecemento cu ta realmente funciona,” Minister Wever a declara.
E conversacion a inclui tambe oportunidadnan pa intercambio di conocemento y cooperacion den agricultura, productividad, tecnologia y agroprocesamento. Segun Minister Wever, e relacion cu Republica Dominicana no mester limita su mes na compra y benta di producto, pero por desaroya den un cooperacion mas amplio cu por beneficia ambos economia.
Un resultado importante cu ta busca ta e disposicion di JAD pa apoya, for di su rol institucional y sectorial, un relacion agrocomercial mas estrecho cu Aruba, identifica areanan di cooperacion y facilita contacto cu e actor productivo relevante pa sigui explora oportunidadnan di comercio, seguridad alimentario y cadena regional di suministro.
E reunion a sirbi pa identifica oportunidadnan, e retonan principal y e estructuranan cu mester wordo fortalece pa logra un relacion comercial mas confiabel y sostenibel.
“Nos meta ta pa Aruba tin mas opcion y menos vulnerabilidad. Cu mas proveedor, mas mercado y mas conexion regional, nos por construi un cadena di abastecemento mas fuerte. Esey ta un parti esencial di un economia cu ta prepara pa futuro,” Minister Wever a conclui.
Ministerio di Finansa, Asuntonan Economico y Sector Primario lo sigui coordina cu e diferente actor relevante pa duna seguimiento na e oportunidadnan identifica y fortalece e relacion agrocomercial entre Aruba y Republica Dominicana.
