Gobierno di Aruba ta sigui fortalece su organisacion interno pa brinda ciudadano un servicio mas efectivo, accesibel y orienta riba resultado. Den cuadro di esaki, Ministerraad a dicidi dia 28 di augustus 2026 pa integra e responsabilidadnan di Servicio na Defensa di Consumidor (SEDECO) den Directie Economische Zaken, Handel en Industrie (DEZHI). E cambio lo drenta na vigor dia 1 di october 2026.
Cu e reorganisacion aki, Gobierno ta concentra maneho, ehecucion y servicio na consumidor y huurdo bou di un solo structura. E meta ta crea mas claridad den responsabilidad, mehora coordinacion y fortalece capacidad di Gobierno pa reacciona mas rapido y efectivo riba desaroyonan economico y social cu ta toca consumidor y huurdo.
Pa Minister di Finansa, Asuntonan Economico y Sector Primario Geoffrey Wever, e cambio ta parti di un proceso mas amplio pa modernisa y fortalece e aparato publico. Proteccion di consumidor no mester keda solamente un responsabilidad riba papel, pero mester tin un organisacion su tras cu por ehecuta e responsabilidad aki di forma accesibel, profesional y efectivo. Door di pone e funcionnan aki den DEZHI, Gobierno ta crea un liña mas directo entre maneho economico, informacion, orientacion y proteccion di ciudadano.
Desde 1 di october 2026, e servicionan relaciona cu consumidor y huurdo lo continua bou di un Afdeling Huur- en Consumentenbescherming nobo dentro di DEZHI. Ciudadanonan lo sigui por acudi pa informacion, orientacion y asistencia relaciona cu nan derechonan como consumidor of huurdo. E reorganisacion, por lo tanto, no ta significa eliminacion di e servicio. Al contrario, e intencion ta incorpora e servicio den un structura mas amplio cu mas capacidad pa coordina, ehecuta y atende ciudadano.
E reorganisacion ta conecta tambe cu e responsabilidadnan nobo cu Gobierno tin den cuadro di e Landsverordening bestuursrechtelijke handhaving consumentenbescherming. E cuadro legal aki ta fortalece proteccion di consumidor y ta exigi un structura publico cu por sostene e ehecucion di e responsabilidadnan correspondiente.
E apoyo operacional na Huurcommissie lo wordo acomoda provisionalmente dentro di DEZHI. Independencia huridico di Huurcommissie ta keda intacto. Cu esaki Gobierno ta sigura continuidad operacional, mientras e posicion independiente di e comision ta wordo respeta.
Un otro prioridad den e transicion ta e personal di SEDECO. Departamento Recurso Humano, DEZHI y representantenan sindical di TOPA y SEPPA a tene consultanan relaciona cu e proceso. Tur empleado di SEDECO lo pasa formalmente pa DEZHI dia 1 di october 2026. Pa funcionnan cu no ta bolbe den e structura nobo, DRH a inicia trayectonan individual di mediacion y reubicacion dentro di Gobierno, teniendo cuenta cu experiencia, capacidad y perfil profesional di cada empleado.
Na mes momento, Gobierno ta inverti den capacidad di e departamento nobo. Ministerraad a aproba un presupuesto pa recluta dos consulent adicional cu lo yuda fortalece e capacidad operacional y sostene e responsabilidadnan cu e departamento lo carga.
Minister Wever ta opina cu un aparato publico moderno mester ta organisa alrededor di e servicio cu ciudadano mester ricibi y no solamente alrededor di structuranan cu a existi historicamente. Integracion di SEDECO den DEZHI ta crea oportunidad pa elimina fragmentacion, mehora coordinacion y construi un sistema di proteccion di consumidor y huurdo cu ta mas concreto, mas accesibel y mas prepara pa e exigencianan di awe y mañan.
Cu e reorganisacion aki Gobierno di Aruba ta sigui structura su organisacion, fortalece ehecucion y sigura cu proteccion di consumidor y huurdo ta keda un responsabilidad publico cu ta wordo ehecuta cu continuidad, profesionalismo y claridad.
