Minister di Sector Primario, mr. Geoffrey Wever, a tene un reunion fructifero cu United Farmers Aruba (UFA), bou di liderazgo di señor Diego Acevedo. E organisacion ta representa un grupo creciente di agricultornan local, horticultornan y productornan innovativo cu ta dedica nan mes pa fortifica e sector primario di Aruba.
E meta di UFA ta alinea directamente cu e vision di Minister Wever, cual ta pa fortalece e sector primario y duna un bos cla y unifica na agricultornan di Aruba. Actualmente, UFA ta conta cu mas di 40 miembro, entre nan tin cultivadornan di mata di fruta, syntropic farmers, productornan di “mushroom”, y horticultornan, un grupo diverso cu ta traha hunto pa logra un produccion alimenticio mas sostenibel y resiliente pa nos isla.
Desafionan ta conoci, awo mester enfoca pa treve solucion
Durante e reunion, Minister Wever y UFA a reconoce cu hopi di e desafionan den e sector agricola ta existi ya pa hopi aña. Ademas, e clima di Aruba ta presenta obstaculonan adicional, motibo pa cual sosten structural di institucionnan gubernamental ta sigui ta esencial.
UFA tambe a mustra interes den e proyecto Agri-Innovation Park (AIP). Minister Wever a aclara cu e AIP ta un iniciativa abiertamente inclusivo, disponibel pa tur agricultor cu tin deseo pa participa, pero a enfatisa cu esnan cu ta traha for di e AIP tambe lo haya sosten den e plan nacional pa fortifica e sector primario.
UFA, den nomber di su miembronan, a pone dilanti e siguiente topiconan importante:
- Acceso na tera agricola y modernisacion di e ley di huurgrond;
- Acceso y calidad di awa pa produccion alimenticio;
- Fortalece e sosten tecnico for di Santa Rosa (DLVV);
- Conectividad electrico y costo di energia;
- Proceso aduanero pa maquinaria y tecnologia agricola;
- Acceso na mercado y proteccion pa producto local.
Minister Wever a confirma cu e puntunan aki ta completamente den linea cu e prioridadnan di su ministerio, y a destaca cu su enfoke ta pragmatico y dirigi riba resultado — no riba estudio, sino riba medidanan cu tin impacto directo y visibel pa agricultornan.
Aunke e tema di tera y regulacion di huurgrond ta cay bou di responsabilidad di otro ministerio, Minister Wever a enfatisa su disposicion pa traha hunto cu su coleganan ministerial pa busca solucion structural pa e desafionan identifica.
“Nos tin hopi aprecio pa e trabou cu United Farmers Aruba ta haci pa uni nos agricultornan y pa duna nan un bos fuerte,”segun Minister Wever.
“E desafionan cu nan a pone riba mesa ta real, y nos ta compromete pa traha hunto pa logra mehoracion sostenibel — cu mas accion.”
Hunto pa un sector agricola resiliente y sostenibel
E reunion ta representa un paso mas den e colaboracion estrecho entre gobierno y comunidad agricola.
Hunto cu organisacionnan manera United Farmers Aruba, e ministerio ta sigui traha pa fortalece seguridad alimenticio, stimula innovacion, y sigura un futuro sostenibel pa nos sector agricola.
E esfuerso aki ta parti integral di e Programa di Gobernacion AVP–FUTURO 2025–2028, cu ta pone enfoke riba reforsa e sector primario, desaroyo economico diversifica y autonomia alimenticio pa Aruba.
Bou di liderazgo di Minister Wever, e ministerio ta sigui crea un ecosistema agricola moderno, productivo y solidario, caminda colaboracion, innovacion y sostenibilidad ta bay man den man pa bienestar di nos pais y su ciudadanonan.
