E cooperacion ta fortalece seguridad alimentario, supervision y control, mientras Aruba ta beneficia di experiencia di Corsou den preparacion di e proceso.

 Aruba y Corsou a firma un Memorandum of Understanding (MoU), marcando un paso importante den preparacion pa futuro importacion di carni di baca directamente for di Colombia.

E acuerdo ta pone enfasis riba salubridad publico, seguridad alimentario, supervision y control durante e proceso di importacion.

Pa Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin G. Wyatt-Ras, e importancia principal di e acuerdo ta cu Aruba por sigui prepara e proceso na un manera sigur y responsabel. E cooperacion cu Corsou ta fortalece preparacion di Aruba prome cu por inicia cu importacion.

Bou liderazgo di Minister Wyatt-Ras, Ministerio, den cooperacion estrecho cu Directie Volksgezondheid (DVG) y autoridadnan di Corsou, a traha riba e condicionnan necesario pa Aruba por avansa cu e proceso.

Pa Minister Wyatt-Ras, beneficio pa e ciudadano ta importante. E producto cu eventualmente drenta mercado Arubano mester cumpli cu e condicionnan necesario di calidad y seguridad alimentario. Alabes, importacion directamente for di Colombia por amplia opcion den mercado pa e consumidor.

Aruba ta beneficia di experiencia di Corsou

Corsou ya tin experiencia cu importacion di carni di baca for di Colombia. E cooperacion entre ambos pais ta permiti Aruba beneficia di e conocemento aki y ta facilita intercambio di informacion, coordinacion den caso di incidente y preparacion conhunto di audit.

Asina, Aruba por sigui prepara su propio proceso, mientras ta mantene su propio responsabilidad y decisionnan.

Seguridad alimentario y control durante henter e cadena

E MoU ta pone enfasis riba siguimento di origen di producto durante henter e cadena.

E origen di e carni, incluyendo e plant y batch original, mester keda identificabel desde momento di importacion te na wardamento, distribucion y benta. Tambe ora e producto ta wordo corta, procesa of paketa di nobo localmente, mester por sigui identifica su origen.

Den caso di un incidente, producto rechasa of recall, Aruba y Corsou lo intercambia informacion relevante rapidamente, pa autoridadnan por actua si tin un posibel riesgo pa salubridad publico.

E cooperacion ta inclui tambe capacitacion y intercambio tecnico entre inspectornan y profesionalnan veterinario. Ademas, ambos pais tin intencion di realisa, den principio, un audit hunto na Colombia un biaha cada dos aña.

Mas opcion pa e consumidor

Aruba ta depende hopi di importacion pa producto di consumo. Cambionan internacional den prijs, transporte y disponibilidad di producto por tin efecto directo riba costo di bida di famianan Arubano.

Un fuente adicional di importacion por amplia opcion den mercado y crea mas espacio pa competencia, cu e posibilidad pa e consumidor beneficia di prijsnan mas accesibel.

E posibel beneficio economico aki mester bay man den man cu e condicionnan necesario pa seguridad alimentario y supervision.

E proceso ta continua

Cu firmamento di e MoU, e proceso ta drenta un siguiente fase. Importacion di carni di baca for di Colombia no ta cuminsa automaticamente cu e acuerdo.

Aruba ainda mester finalisa e aspectonan tecnico y huridico necesario y formalisa e acuerdonan di trabou cu e autoridadnan competente na Colombia, particularmente Instituto Colombiano Agropecuario (ICA) y Instituto Nacional de Vigilancia de Medicamentos y Alimentos (INVIMA), prome cu por inicia cu importacion.

Minister Wyatt-Ras y Minister Geoffrey Wever, encarga cu Finansas, Asunto Economico y Sector Primario, lo sigui traha riba e tramitenan necesario pa haci futuro importacion di carni di baca for di Colombia posibel.

Cu e acuerdo aki, Aruba y Corsou ta fortalece nan cooperacion y coordinacion den e preparacion, supervision y control relaciona cu futuro importacion di carni di baca for di Colombia.

E MoU ta valido pa un periodo di tres aña y lo wordo evalua despues di e prome aña.

Minister Wyatt-Ras a expresa su gradicimento na Minister di Salubridad di Corsou, sr. Tyron Boekhoudt, y e ekipo di Corsou pa nan cooperacion y aporte den e proceso cu a conduci na firmamento di e acuerdo.

Tambe a gradici e ekiponan di DEZHI y DVG pa nan aporte durante e preparacion y coordinacion di e proceso, cu reconocemento special pa sra. Maria Dijkhoff Pita di DEZHI y sra. Judelca Briceno di DVG, cu tabata presente durante e firmamento. E conseheronan di ambos ministerio tambe a ricibi gradicimento pa nan aporte durante e proceso.