Recientemente Minister di Salubridad, Asuntonan Social, Cuido di Adulto Mayor y Maneho di Adiccion, drs. Melvin Wyatt-Ras, a bishita e facilidadnan di Stichting Eliezer, caminda el a wordo ricibi pa director sr. Gino Frans y su team di maneho pa un rondleiding y presentacion detaya.
Stichting Eliezer ta un centro di rehabilitacion specialmente destina pa sernan masculino cu tin problemanan di adiccion of problema di salud mental. E centro ta ofrece opname y guia a base di principionan di e evangelio, enfoca riba restauracion, desaroyo personal y preparacion pa reintegracion den sociedad como ciudadano responsabel y exitoso.
Durante e bishita, Minister Wyatt-Ras a haya e oportunidad pa wak diferente parti di e facilidad: cushina, cafetaria, area recreativo, y espacio di estadia pa habitantenan. Tambe e centro ta uza animalnan manera burico y turtuga como parti di terapia, den un ambiente natural, rondona di naturalesa, arte indjan y un trankilidad cu ta stimula bienestar.
Actualmente, Stichting Eliezer ta brinda cuido na 25 habitante, adapta na nan necesidad individual. E director y su famia mes ta biba riba e tereno, pa crea un ambiente di seguridad, comunidad y structura familiar. Aparte di terapia cu naturalesa y bestia, orientacion spiritual tambe ta forma parti integral di e proceso di rehabilitacion.
Minister Wyatt-Ras a expresa su admiracion y respet pa sr. Frans, su famia y tur e empleadonan, pa e entrega y amor cu nan ta pone den un trabou tan noble y vital. E minister ta kere den colaboracion continuo y sosten structural y humano, pa fortalece e impacto positivo cu Stichting Eliezer tin den nos comunidad.
“Esnan cu ta lucha cu dependencia tambe ta parti di nos comunidad. Adiccion ta un malesa, y cu cuido adecuado, cada persona merece un segundo oportunidad pa por logra un bida digno y yena cu proposito,” Minister Wyatt-Ras a conclui.
E bishita ta forma parti di un serie di bishita y colaboracion cu instancianan cu ta ofrece cuido directo na esnan vulnerabel den nos comunidad. Minister Wyatt-Ras ta compromete pa sigui sostene e red di apoyo humano y inovativo cu Aruba tin riba su territorio.
