No tin ningun evidencia cu a kibra regla cu tiramento di pagara
No tin regla y no ta existi ningun publicacion di DOW riba dicho regla
Un ves mas, e periodistanan liga na AVP a bolbe trece “noticia” basa riba redashi. Minister Xiomara Maduro a wordo acusa di a cende un pagada dia 6 di Januari 2022 na su cas y cu esaki ta contra regla.
SOLO DI PUEBLO a bay busca dicho regla cu ta wordo referi na dje y pa nos sorpresa, nos no por a encontra ningun publicacion, den ningun medio di comunicacion, unda ta indica cu lo tin dicho prohibicion pa tira klaapchi.
E unico cu nos por a haya ta menciona e fechanan cu SI por a bende klaapchi y esey ta termina dia 31 December pa 9’or anochi.
Tambe Crisisteam a impone un medida, cu comerciantenan por tira pagara te cu 12’or di merdia, riba dia 31 di december. Ningun caminda tin skirbi cu un cas no mag tira su pagara mei anochi ni tampoco dia 6 di januari.
Pues un ves mas por mira cu e trio politico, Patrick, Nelson y Marko, kier keda crea noticia falso, keda instiga contra tur hende cu ta liga na Gobierno, pa e unico motibo cu nan compania no ta hayando e acostrumbrado 100 mil florin pa luna, cu Mike Eman tabata duna nan.
Si encaso mes por tin un deciscion di cualke minister cu no mag tira klaapchi, tabata deber di e departamento concerni pa laga publica esaki den tur medio di comunicacion. Pasobra tampoco por ta asina cu cierto departamento mester kere cu pueblo mester tin olfato di cacho y cu nos mes mester por hole cualkier decision.
SOLO DI PUEBLO a check tur medio di comunicacion, y NO a encontra ningun comunicado cu ta bisa algo asina. Esey kemen cu un biaha mas, e periodistanan afilia na AVP a trece noticia robes, manipula henter un pueblo, cu Xiomara a haci algo robes. Esaki ta un les atrobe pa tur esnan cu ta scucha of lesa coy kens y ta bay tras di esnan cu nan unico meta ta pa desacredita tur nan oposirornan politico.
