Minister di Cultura Xiomara Maduro ta informa cu na vispera di e conmemoracion di 160 aña di abolicion di sclavitud den Reino Hulandes, Ministerio di Cultura ta presenta un serie di programa pa informa comunidad riba historia di sclavitud di nos Pais. Durante e programanan informativo varios experto lo comparti nan conocemento cu nos comunidad tocante varios aspecto relaciona cu e topico di sclavitud na Aruba.
Durante e prome programa ‘Sclavitud, parti di herencia di Aruba’, e historiado, Dr. Adi Martis lo haci un recorido door di e epocanan di Aruba. Sr. Martis lo elabora riba e temporada durante cual sclavitud a cuminsa na Aruba. Elo comparti informacion tocante e poblacion di catibo, doñonan di catibo y famnan di catibo. Tambe elo conta nos kico a pasa despues di 1863 na Aruba, na momento cu e catibonan a haya nan libertad. Alabes elo splica e influencia di sclavitud y colonialismo riba nos economia y cultura y hopi informacion valioso mas.
‘Sclavitud, parti di herencia di Aruba’, lo pasa diasabra awor dia 17 di juni pa 8’or di anochi na Telearuba y diadomingo dia 18 di juni pa 8’or di anochi na Diario tv. Minister Maduro ta extende un invitacion for di aworaki pa hunto den ambiente di famia pa wak e programa aki. Ta masha importante pa nos como mayor, adultonan y nos muchanan haya conocemento di e parti di historia aki cu hopi di nos no ta na altura di dje.
Minister Xiomara atraves di Ministerio di Cultura a inicia cu un campaña pa conscientisa nos comunidad tocante e historia y abolicion di sclavitud na Aruba. E serie di programanan informativo na television ta parti di e campaña aki. E siguiente programanan lo pasa entrante dialuna 26 di juni tur dialuna 7’or na Telearuba y diamars 8’or na Diario tv.
