ORANJESTAD – Dialuna, minister Xiomara Maduro, tabata invitado den e programa di Go Cultura Foundation, “Na Cas cu Edjean”, caminda cu entre otro el’a comparti su vision y proposito pa cu cultura di nos pais pa e siguiente 4 añanan di gobernacion. 

Durante e anochi aki, minister Maduro a elabora mas riba e topico di cultura y educacion caminda cu minister Maduro a splica cu riba agenda ta para pa ehecuta e parti di ‘Cultuur Educatie’ cu ta un topico cu den reino Hulandes tambe ta wordo papia di dje. Minister Maduro a duna di conoce cu no obstante cu e carteranan di Enseñansa y Cultura no ta hunto, lo traha hunto cu minister di Enseñansa pa asina realisa e parti aki. 

Minister Xiomara Maduro a elabora tambe riba industria creativo cual e lo bay desaroya durante e proximo añanan. Minister Maduro a enfatisa cu e creacion di esaki lo cuminsa for di cero pa motibo cu pa crea un industria nobo, den e caso aki uno creativo, tin mester di un departamento cu ta para fuerte, cu ta ekipa pa por haci e trabou y cu por brinda e sosten necesario pa esaki pero tambe mester alinea tur e otro departamentonan cu tin di haber cu esaki pa asina hunto nan por traha riba e industria creativo nobo cu lo bin cune.

Finalmente minister Maduro a splica tambe mas riba e fondonan necesario pa nos industria creativo y tambe con e pandemia a afecta esaki y con gobierno lo yuda pa esnan den e industria aki por yega na e fondonan necesario pa por sigui.

Minister Xiomara Maduro kier gradici Edjean Semeleer pa tabata tine como invitado den su programa y ta spera cu den futuro nan por bolbe sinta atrobe pa asina wak bek riba tur locual a wordo haci pa cultura di nos pais.

LEAVE A REPLY

Please enter your comment!
Please enter your name here