Cu ta tuma luga dianan 3 pa 8 di october.
ORANJESTAD: Diahuebs atardi Minister Endy Croes tabata presente na e conferencia di Prensa di Future Star Baseball Academy cu a lansa e di 2 edicion di e torneo di ‘Baseball in Paradise”. E torneo di baseball ta tuma luga di 3 pa 8 di october den diferente stadionnan rond di Aruba. Mas di 3000 persona y 47 ekipo di e.o. Bonaire, Curaçao, Alemania, Santo Domingo, Bahamas y Aruba ta batayando den e tremendo campeonato aki.
E mandatario di Deporte a expresa cu e la compronde di organisado, sr. Shurty Tremus cu aña pasa un total di 300 persona a bin Aruba. E aña aki e acogida pa e torneo ta asina grandi na unda cu mas di 3000 persona ta un siman na Aruba. Mas di 140 wega ta wordo hunga den e siman aki.
Minister Endy Croes a indica cu e vision di Gobierno di Aruba, ta pa promove ‘sport tourism’ y esaki ta un forma; na unda cu organisadonan mes ta bin cu e iniciativa pa organisa un campeonato di e magnitud aki y ta trece riba 1300 persona entre hungado, mayornan y famia Aruba. Nan ta hospeda den hotel, ta huur auto nan ta keda na Aruba pa un siman, ta duna contribucion na e vision di Gabinete Wever – Croes II. Minister Endy Croes ta gradici Aruba Tourism Authority (ATA) pa duna sosten y aporte. Como tambe e mandatrio ta gradici FFD cu a traha hopi di cerca cu Future Star Baseball Academy cu duna nan aporte enorme na tur e veldnan cu nan ta maneha. E dignatario a gradici e organisacion di Future Star Baseball Academy tanto na Hulanda como na Aruba. Como Minister di Deporte nos ta duna nos sosten na e proyecto bunita aki.
Concluyendo Minister Endy Croes ta invita henter e pueblo di Aruba pa e gran apertura di dos edicion di “Baseball in Paradise” cu ta tuma luga awe tardi pa 5:30 pm na Joe Laveist Sportpark na San Nicolas. Cu e sosten di comunidad lo tin un stadion “sold out” den ambiente di brassband. Ban duna apoyo y sosten nos muchanan durante e siman aki. Palabran di pabien na organisado! Cu e 4D di deseo, disciplina, dedicacion y determinacion boso ta logra!
