Ministerio di Educacion y Landelijk Werkgroep HBO Nederland kier uni forsa pa e exito di estudio di studiantenan Arubano

Den cuadro di mehoracion di e transicion y exito academico di studiantenan cu ta continua nan educacion superior na Hulanda, Ministerio di Educacion a tene un combersacion fructifero cu representantenan di e Landelijk Werkgroep HBO Nederland. E reunion aki tabata tin como meta principal pa informa tocante e programa y trabounan amplio di e werkgroep, como tambe explora e posibilidad pa Aruba, particularmente e stakeholders di educacion, bira un socio clave den e iniciativa aki.

E meta comun entre tur dos parti ta pa mehora e preparacion y guia di nos futuro studiantenan cu ta biaha pa Hulanda, contribuyendo finalmente na un mayor exito di estudio y bienestar pa e studiantenan di nos islanan. E Landelijk Werkgroep HBO Nederland ta un colaboracion cu ta conta cu e aporte y compromiso di dies hogeschool na Hulanda. E trabou aki ta enfoca tanto riba e futuro studiantenan como riba esnan cu actualmente ta studiando na Hulanda, pa purba fortalece nan proceso di transicion, adaptacion y rendimento academico.

Como parti di e agenda, representantenan di e werkgroep lo bishita Aruba, Boneiro, Curacao y e islanan SSS durante e luna di November pa ehecuta e Study Choice Program na diferente scol secundario. E programa aki ta dirigi na e studiantenan Caribeño cu ta preparando pa drenta educacion superior. Adicionalmente, den e mesun periodo aki lo tuma luga un actividad special di teatro enfoca riba e proceso di escogencia di estudio.

Sosten firme di Ministerio di Educacion
Ministerio di Educacion ta reitera su compromiso firme y sosten absoluto na e tipo di iniciativanan aki cu ta pone bienestar y futuro di nos hubentud central. E Ministerio ta reconoce cu un bon preparacion, orientacion adecuado y un red di apoyo solido for di prome cu e studiante sali di Aruba ta fundamental pa supera e retonan di adaptacion y garantisa un trayecto exitoso na Hulanda. Por lo tanto, e Ministerio ta mira cu optimismo e oportunidad pa fortalece e alianza aki cu e Landelijk Werkgroep HBO Nederland y lo sigui respalda tur iniciativa cu ta habri caminda pa e desaroyo integral di nos studiantenan.