Den un esfuerso pa modernisa y eleva e calidad di cuido na Aruba, bou liderazgo di Minister Wyatt-Ras, e Ministerio di Salubridad, Asunto Social, Cuido di Adulto Mayor y Maneho di Adiccion a formalisa e Comision Nacional pa Revalidacion y Medionan di Apoyo (Stuurgroep revalidatie en hulpmiddelen) pa medio di un Ministeriële Beschikking.
E paso aki ta marca un avance strategico den e implementacion di e Plan Strategico pa Revalidacion y Medionan di Apoyo 2026–2030, cu ta enfoca riba un sistema di cuido mas coordina y accesibel pa comunidad.
Un di e motibonan principal pa e creacion di e Comision aki ta pa atende e escasez di personal specialisa den un forma mas structural. Pa e motibo aki, e Ministerio a duna e Comision Nacional e encargo pa guia un Werkgroep pa Disponibilidad y Capacitacion di Personal.
E plan strategico ta inclui un analisis di personal den e sector y e medionan di apoyo, pa identifica e necesidad actual y anticipa demanda pa specialistanan den futuro. Asina nos por garantisa cu comunidad tin acceso na cuido di calidad, den mannan experto.
E Comision Nacional ta inclui diferente actor clave di nos sistema di salubridad, pa sigura cu tur hende ta traha den e mesun direccion. Bou guia di e Ministerio, e grupo aki lo fungi como motor tras di e implementacion di e Plan Strategico pa Revalidacion y Medionan di Apoyo 2026–2030.
E aliansa aki ta consisti di:
- Directie Volksgezondheid (DVG), cu ta hunga un rol central den e desaroyo di e sector
- Uitvoeringsorgaan AZV (UO-AZV)
- Dr. Horacio E. Oduber Hospitaal (HOH)
- Huisartsen Vereniging Aruba (HAVA)
- Arubaanse Vereniging van Specialisten (ASHA)
- Aruba Vereniging van Fysiotherapeuten (AVF)
- Plataforma pa Personanan cu Limitacion (PPL)
Den colaboracion cu Organisacion Pan Americano di Salud (PAHO) y conforme e vision di Organisacion Mundial di Salud (WHO), e iniciativa aki ta contribui na e desaroyo di un sistema di revalidacion di calidad.
Aruba ta alinia cu e Obhetivonan di Desaroyo Sostenibel (SDG 3, 4, 8 y 10), cu ta enfoca riba salud, bienestar y participacion den sociedad. E iniciativa aki ta inclui tambe revalidacion pa personanan cu limitacion, cu ta pone enfasis riba fortalece nan participacion, independencia y mehora nan calidad di bida.
E desaroyo di un sistema di revalidacion coordina ta contribui na cuido mas inclusivo y accesibel pa tur hende cu tin mester di apoyo. E Ministerio kier stimula un sistema di cuido mas coordina y orienta riba e persona.
“Nos ta construi un fundacion solido pa asina tur hende por sinti cu cuido di revalidacion ta un pilar fuerte, humano y sostenibel pa nos isla,” segun e Ministerio.
