Ministerio di Salubridad, Asunto Social, Cuido di Adulto Mayor y Maneho di Adiccion a ricibi e rapport di recomendacion traha door di prof. dr. Patrick Jeurissen y Edwin Brugman tocante e fortalecemento y posicionamento di Kwaliteitsinstituut Gezondheidszorg (KIG) Aruba.
A prepara e rapport di recomendacion cu asistencia tecnico di TWO Hulanda y ta basa riba consulta cu 40 stakeholder y partner relevante den sector di salud. E ta contene recomendacion con pa sigui fortalece KIG y consolida su rol den mehoracion y pa garantisa calidad di cuido den salubridad na Aruba.
Minister Sra. drs. Melvin Wyatt-Ras a expresa:
“Cu e rapport di recomendacion aki, nos tin un fundeshi importante pa sigui fortalece Kwaliteitsinstituut Gezondheidszorg na Aruba. Nos meta ta pa duna e instituto mas forma, mas capacidad y fortalece su rol independiente, pa asina garantisa calidad di cuido pa nos pueblo.”
Prof. dr. Patrick Jeurissen a expresa
“Miho calidad di cuido ta importante pa tur pais y esaki ta conta tambe pa Aruba. Mi ta contento di mira cu Aruba ta tuma pasonan concreto pa fortalece calidad den cuido di salubridad y pa duna e tema aki un base duradero mediante su propio instituto.”
Den e periodo cu ta bin, e rapport di recomendacion lo wordo comparti cu diferente stakeholder relevante pa haya nan reaccion y determina e siguiente pasonan pa implementa e recomendacionnan.
Ministerio ta gradici TWO, e expertonan envolvi y tur stakeholder cu a contribui na e proceso. Hunto cu tur partnernan relevante, Ministerio lo sigui traha riba e siguiente pasonan pa fortalece KIG y sigui mehora calidad den cuido na Aruba.
