ORANJESTAD – Diabierna ultimo Minister di Turismo a reuni na bestuurskantoor cu e board di Tourism Product Enhancement Fund (TPEF). Durante e reunion aki a tuma desicionnan pa asina por finalisa e presupuesto di aña 2023 pa asina encamina e proceso di bai departamento di conseho huridico, sigui ministerraad pa haya aprobacion, despues pa bai pa Raad van Advies pa despues gobierno manda esaki pa parlamento. Minister Oduber ta spera cu e proceso aki por cana lihe pa entrega e presupuesto 2023.
Minister Oduber a indica cu toca varios di e proyectonan y inversionnan cu mester tuma lugar den cuadro di e mehoracion di producto Aruba, pa asina mantene pais Aruba competitivo. Segun e mandatario e tabata un hopi bon reunion caminda e board di TPEF tambe por a duna nan input riba cua ta e proyectonan cu nan ta haya ta mas importante pa inclui den e presupuesto di 2023.
Despues di e reunion aki e mandatario conhuntamente cu e board di TPEF y Minister Arends a ricibi un presentacion di Fundacion Parke Nacional Arikok (FPNA). E presentacion aki tabata di un proyecto cu FPNA tin cu ta e proyecto di Bubali Wetlands. Minister Oduber ta haya e proyecto presenta uno hopi ambicioso den cuadro di conservacion di naturalesa y medio ambiente. Den esaki tambe kier crea un lugar pa localnan y nos turistanan por experencia e Bubali wetlands.
Den e plan nan di FPNA tambe tin un Visitor Information Center (VIC) cu lo mester fungi como un centro di informacion di e parke nobo cu lo mester wordo construi. E idea ta pa e VIC fungi tambe como un museum di Aruba su naturalesa.
Minister Oduber a splica FPNA cu e ta un proyecto ambicioso y cu Gobierno sigur lo purba sostene tipo di iniciativanan asina. Ta busca e manera y wak si tin e espacio financiero conhuntamente cu otro Ministerionan den Gobierno pa asina wak si lo por ehecuta e proyecto aki. Minister Oduber a indica cu e proyecto aki ta uno costoso pero alabes ta un bunita proyecto cu a keda presenta.
Minister Oduber a haci palabracion cu FPNA cu lo bay haci un otro reunion despues cu revisa e cuadro financiero.

LEAVE A REPLY

Please enter your comment!
Please enter your name here