ORANJESTAD – Fiscal Patrick van der Biezen, actuando como vocero di prensa di Ministerio Publico a splica prensa dialuna mainta, cu Ministerio Publico a cuminza un otro caso contra ex minister Paul Croes. Ta trata aki di un ontnemingszaak contra Paul Croes y su esposa. Esaki nifica cu nan lo kier kita tur propiedad of placa cu Paul Croes a haya na un forma inhusto, for di actonan coruptivo.
Manera ta conoci, desde 2015 Paul Croes tabata bao investigacion, unda a haci tambe un investigacion financiero. E investigacion ta simpel y basicamente ta: Cu e salario di Paul y su esposa, nan por dispone di tur loke nan tin? Nan a yega na nan cosnan via di nan salario?
E resultado di e investigacion aki a sali negativo. Cu e salario di Paul Croes y su esposa, nan no por a yega na loke nan tin.
Tampoco nan por a hustifica di cual otro manera nan por a yega.
Como tal, Ministerio Publico ta mira esaki como producto di actonan coruptivo y dje forma ey ta busca pa kita tur e beneficio aki for di Paul Croes y su senjora.
Fiscal a confirma cu e caso aki lo cuminza dia 28 di October 2021
