Dialuna mainta, Prome Minister, Mike Eman hunto cu Minister di Finansa, Asunto Economico y Sector Primario Geoffrey Wever a ricibi e resultadonan preliminario di e Mission Article IV di International Monetary Fund (“IMF”). E Mission Article IV di IMF a tuma luga durante 23 di september y 6 di october.
Durante e bishita, e delegacion di IMF a reuni cu diferente entidadnan gubernamental, incluyendo Directie Financiën, Banco Central di Aruba (CBA) y otro institucionnan relevante, pa evalua e situacion actual y futuro di Aruba riba tereno financiero, economico y monetario.
E mision di IMF ta parti di un proceso anual di guia y conseho cu tur pais-miembro di IMF ta pasa pa garantisa un evaluacion independiente di su política fiscal y economico. Pa Aruba, esaki ta un oportunidad pa fortalece transparencia, credibilidad y consistencia den nos maneho financiero y pa confirma cu nos pais ta riba e caminda corecto di stabilidad y sostenibilidad.
Reconocimento pa progreso y liderazgo financiero
Durante e reunion di clausura, e delegacion di IMF, encabesa pa sr. Marco Arena, a expresa su aprecio pa e nivel di colaboracion y transparencia di e Gobierno di Aruba. Segun IMF, Aruba a logra stabilisa su recuperacion economico despues di e shock global di COVID-19, y su maneho prudente di finansa público ta contribui na stabilidad economico actual.
E delegacion a nota tambe cu Gobierno ta demostra liderazgo y disciplina fiscal den su maneho di presupuesto, mientras cu e política pa reduci deficit y controla gasto ta duna resultado visibel.
Minister Geoffrey Wever a remarca cu:
“E cooperación cu IMF ta un refleho di e tipo di gobernacion cu nos ta aspira: un cu ta basa riba responsabilidad, transparencia y planificacion strategico. E evaluacionnan di IMF ta confirma cu Aruba ta moviendo den e direccion corecto pa fortifica su base economico y financiero, den beneficio di nos pais y nos ciudadanonan.”
Presupuesto 2026: un presupuesto pa crecemento y stabilidad
Minister Wever a informa cu despues di solamente cinco luna di huramentacion, Gabinete AVP–FUTURO a logra entrega e Presupuesto 2026 na tempo, conforme ley y e normanan fiscal vigente. E presupuesto aki ta un muestra di gobernacion responsable y simbolisa un compromiso serio cu stabilidad y crecemento.
Den e presupuesto, Gobierno ta aloca 50 miyon florin pa inversion structural y un otro 50 miyon florin pa mehoracion di poder di compra, como parti di implementacion di e Fondo di Inversion y Koopkrachtplan. Esaki ta un paso concreto pa fortalece e infrastructura di nos pais y albes duna alivio financiero na ciudadanonan di nos pais.
E minister tambe a resalta cu e bahada di accijnzen riba gasolin y diesel pa tur usuarionan cu 10 cent ta keda vigente, y cu e pago mensual di 250 florin pa tur pensionado ta sigui forma parti di e politica pa fortifica poder di compra den comunidad.
Diversificacion economico y inovacion como base di futuro
IMF a expresa apoyo pa e direccion economico di Aruba, specialmente den e esfuerso di Gobierno pa diversifica e base economico y reduci dependencia di un solo sector.
Minister Wever a splica cu via cooperacion cu Hulanda den cuadro di e Landspakket, y den marco di e Programa di Gobernacion AVP–FUTURO 2025–2028, Aruba ta implementando paso concreto pa desaroya sectornan innovador manera agricultura comercial, industria creativo y sector di tecnologia financiero (FinTech).
“Diversificacion no ta un opcion, e ta un necesidad. E stabilidad di nos paisita depende di e capacidad pa crea mas fuente di ingreso y mas oportunidad pa nos ciudadanonan. Nos ta trahando pa desaroya un economia moderno, sostenibel y competitivo,” minister Wever a bisa.
Compromiso continuo cu gobernacion sostenibel
Minister Wever a conclui e reunion expresando su gratitud na e delegación di IMF pa su colaboracion y recomendacionnan constructivo. E a reafirma cu Aruba lo sigui traha den e spirito di transparencia y responsabilidad fiscal, cu un enfoke constante riba progreso, sostenibilidad y bienestar di su pueblo.
“E cooperacion cu IMF ta un instrumento valioso pa sigura cu nos maneho ta riba caminda di stabilidad y progreso. Aruba ta compromenté pa mantene disciplina fiscal, pero tambe pa crea espacio pa crecemento y inovacion. Nos pais ta riba caminda firme pa un futuro di prosperidad compartí,” minister Wever a conclui.
###CH#
