Mistletoe Pop Ups, un proyecto di NEXA Foundation, a inaugura cu gran exito su di tres edicion di Mistletoe Christmas Park durante e fin di siman di 23, 24 y 25 oktober 2026. E evento a transforma Parke di Paradijswijk den un lugar magico, yen di luz, ambiente di Pasco y comunidad.
Mistletoe Christmas Park ta ofrece mucho mas cu un mercado di Pasco. Cu su decoracionnan festivo, iluminacion caluroso, Mistletoe Pop-Up Café y un pantaya pa disfruta di pelicula di pasco, e parke ta invita bishitantenan pa relaha, pasa tempo cu famia y amigonan y disfruta di e ambiente di Pasco den un manera special. Na Mistletoe Pop-Up Café, bishitantenan por deleita nan mes cu un delicioso hot chocolate, eggnog, sangria y ayaca tradicional, cu ta haci e experiencia di Pasco ainda mas agradabel y special.
Ademas, cu participacion di mas di 45 vendor local, Mistletoe ta ofrece un variedad amplio di producto pa tur gusto. Di decoracionnan di Pasco, joya y producto di cuido personal manera habon artesanal, te na delicianan tradicional di temporada manera pan cu ham di Pasco, ponche crema, bolo y diferente sorto di cos dushi. Na Mistletoe tin algo special pa tur hende!
Un momento particularmente special durante e fin di siman inaugural tabata e bishita di miembronan di Club Kibrahacha riba diasabra 24 oktober. Nan presencia a contribui na e ambiente alegre y ameno cu ta caracterisa Mistletoe. Durante henter e fin di siman, e parke a conta cu un bon asistencia di publico, cu a disfruta di e ambiente festivo, e diferente actividadnan y e oportunidad pa comparti momento special hunto.
Cu e prome fin di siman exitoso tras di lomba, Mistletoe Pop Ups ta invita henter comunidad Arubano pa disfruta di e magia y ambiente di Pasco durante e proximo fin di siman, 6, 7 y 8 november 2026.
Mistletoe Christmas Park lo ta habri su portanan na Parke di Paradijswijk, banda di Dyon Center, na Caya Frère Bernardinus 10, segun e siguiente horario:
- Diabierna y diasabra: 7:00 pa 9:30 di anochi
- Diadomingo: 6:30 pa 8:30 di anochi
E comunidad lo tin e oportunidad pa disfruta di Mistletoe Christmas Park durante e fin di simannan di 20, 21 y 22 november y 27, 28 y 29 november 2026.
Mistletoe Pop Ups ta expresa su sincero gratitud na comunidad Arubano pa e sosten continuo na nos creadornan y emprendedornan local. Mas cu un mercado di Pasco, Mistletoe ta un lugar di encuentro unda creatividad, tradicion y sentido di comunidad ta bin hunto pa crea recuerdonan inolvidabel.
Nos ta spera di mira boso tur e fin di siman aki na Mistletoe Christmas Park, pasobra e magia di Pasco ta mas special ora nos compartie hunto.
Y ken sa… tin un johnny cake cu ham di Pasco ta yama bo nomber!
Mistletoe Pop Ups | @mistletoepopups riba retonan social
