Mon Plaisir College Havo-Vwo ta recaudando fondo pa e studiantenan di HAVO 4 por experencia nan ‘studiereis’ pa Hulanda. Manera ta conoci, e studiantenan cu ta den ‘voorexamen’ klas na Aruba, ta haya e oportunidad pa biaha bay Hulanda y conoce e pais. Ademas, e studiantenan ta haya e oportunidad pa wak e estilo di bida, cultura y tambe e sistema di educacion na Hulanda.
Durante e biahe aki, e studiantenan lo bishita diferente universidad na Hulanda pa haya informacion y tambe un miho bista di diferente programa di estudio. E meta di e biahe aki ta pa duna e studianten un idea pa yuda guia nan pa cu nan escogencia ora cu nan caba cu voortgezet onderwijs na Aruba. Ta hasi esaki cu e cooperacion di diferente organisacionan na Hulanda cu ta focus pa yuda prepara studiante di Caribe pa e etapa nobo aki di nan bida pa asina ta exitoso.
Pa haci e biahe aki un realidad, e studiantenan di HAVO 4 di Mon Plaisir College Havo-Vwo ta trahando duro pa recauda fondo pa nan biahe. Conhuntamente cu Bingo Aruba, lo tin un bingo special di Mon Plaisir College Havo-Vwo dia 1 di februari 2025 pa 7’or di anochi. Tur hende por participa na e bingo aki cu e chens pa gana e premio mayor di e bingo, cual ta 2000,- florin cumprando un carchi cu ta costa solamente 10,-.
Mon Plaisir College Havo-Vwo ta invita pueblo di Aruba pa cumpra nan bingo pa por yuda e studiantenan haci e biahe aki un realidad. Bo por pasa na diferente punto di benta di Bingo Aruba pa cumpra e bingo di dia 1 di februari 2025: Shiribana bingo Center, Queen Euro bingo center Bubali, Manton lottery Pos Chikito y Citgo Essoville.
Nos ta invita cualkier compania cu ta interesa pa yuda pa medio di compra di bingo pa tuma contacto cu nos na f.vandijk@monplaisircollegearuba.com y nos ta gradici tur hende di antemano cu ta yuda haci e biahe aki posibel. No perde bo chens pa bira e siguiente ganado!
