Como doño orguyoso di Cas Veneranda, Stichting Monumentenfonds Aruba (SMFA) a celebra e logro cu desde siman pasa Cas Veneranda tin su dak bek! E dak a bay perdi durante e candela na aña 2014.
Na aña 2012 Monumentenfonds a cuminsa cu e preparacionan di e proyecto aki y despues di hopi tempo a logra di haya tur tres rekisitonan pa un proyecto exitoso: un acuerdo di compra cu e doñonan, acuerdo cu huurdonan pa despues di restauracion y financiamento.
Monumentenfonds ta gradici e famia pa e cooperacion durante e proyecto aki. Nan a comparti hopi di nan recuerdonan y informacion di e cas y su habitantenan.
Monumentenfonds ta gradici tambe e huurdonan. Departamento di Asunto Economico, Comercio y Industria (DAECI) lo huur e cas su di dos piso. Danki na e vision di Minister Geoffrey Wever pa ubica mas departamentonan den monumentonan na binnenstad. Diabierna Sra. Nathaly de Mey a anuncia cu e lo ta e huurdo pa e parti banda links na skina di e tereno pa su restaurant nobo: Veneranda.
Pa e parti financiamento, Monumentenfonds ta hopi agradecido pa cu hypoteca di APFA y e subsidio di Ministerio di Asuntonan Economico, pa nos por a cumpra e monumento. Y cu un low-interest loan di Nationaal Restauratiefonds, Monumentenfonds por restaura full e edificio na su estado original.
Pero e grupo di hende cu Monumentenfonds kier a gradici mas e dia aki ta e contratista (Jash Development), e bouwteam (Hoevertsz Archidesign, Protec, Hecom, Smart y Dynaf) e subcontratistanan y tur trahadornan cu ta trahando duro tur dia pa realisa e bunita proyecto aki. Nan a yega e punto mas halto di e proyecto y Monumentenfonds ta desea nan hopi exito pa cu e resto di e proyecto! Asina tur ta yuda pa preserva nos historia pa futuro!
