Diasabra anochi rond di 9’or y 45 ta sosode un caso di hit&run altura di Citgo Palm Beach.
Polis y ambulance a wordo dirigi mesora pa e sitio, unda cu un motociclista a wordo laga atras gravemente herida.
Ta asina cu di ayera caba por a mira basta brommer entre nan Harleys moviendo rond riba nos isla.
Diasabra anochi un grupo di Harley Davidson moviendo altura di Citgo Palm Beach unda cu un motociclista conoci ta wordo alcansa pa un Kia Picanto.
E Kia Picanto cu dos ocupante aden a para na prome instante y te hasta a cende e hazard lights. Pero den un rato a dicidi di bandona e sitio, siendo cu un multitud di hende rond di dje a mira tur locual a sosode.
LOCUAL A PASA
E Kia Picanto lo pasa ranca e pia robes di e motociclista di inicial A. Segun amigonan e motociclista a perde masha hopi sanger y tawata sclama di dolor.
E pia lo a sufri hopi daño.
Cu urgencia e la wordo transporta pa Hospitaal unda cu e lo mester haya tratamento specialisa cu urgencia.
Caminda dilanti Citgo Palm Beach mester a wordo cera den ambos banda.
KIA PICANTO CU WORDO LOCALISA
Durante cu e Kia Picanto a huy di e sitio e la wordo sigui mesora pa varios motociclista. Dado momento parse cu e te hasta e la manda auto riba un motociclista testigo cu a mira locual a pasa y a sigui’e.
E la bay staciona altura di Fisherman Hut, banda di otro dos vehiculo, te ora cu polis a yega y a confronta nan y lo a hayanan ta bebe manera nada un pasa.
Chauffeur di e Kia a wordo deteni y hiba warda.
Amigonan di e motociclista seriamente herida a keda na e sitio y a papia cu polis y a keda warda polis di trafico y Forensys.
