ORANJESTAD – Gobierno di Aruba a duna di conoce nan strategia nobo pa enfrenta e crisis ambiental na e planta di purificacion di awa (RWZI) na Bubali. En bes di e inversion structural den un planta moderno manera a wordo planea anteriormente, e maneho actual a opta pa un caminda cu hopi ta considera un “pleister” riba un problema cu mester operacion profundo.
E plan: Renoba motor di 1972 y tuberianan pa Malmok
E propuesta principal di Gobierno ta basa riba e “refurbishment” (drechamento) di e motornan existente na Bubali Plas, cualnan ta data di 1972. Ademas, nan plan ta inclui:
Instalacion di tuberianan bou tera pa conecta Bubali cu e planta na Parkietenbos.
Desvia e exceso di awa pa area di wetlands na Malmok.
Parlamentario Stephany Sevinger mes a confirma e cambio di maneho aki den su declaracionnan recien, bisando: “En bes di sigui cu inversionnan grandi sin control, e profesionalnan capacita na cabes awo, ta enfoca riba mantenimiento, optimisacion di instalacionnan existente…”
Capacidad: Motor Bieu vs. demanda 2026
E pregunta fundamental cu comunidad y expertonan ta haci ta: Con un motor di 54 aña bieu, maske bo drech’e, por carga e demanda di e miles di kambernan di hotel nobo cu ta habriendo nan porta? Un motor drecha no ta cambia e capacidad fisico di e planta. Si e fluho di awa sushi drentando ta redobla, e planta di 1972 simplemente no tin e “volume” pa procese. Esaki ta nifica cu e risico di mal holo y contaminacion di nos costanan ta keda un menasa constante.
Invento y fracaso di pasado: 17 Miyon di Ecogas/WEB
Loke ta mas preocupante pa hopi observador ta e similaridad entre e proyecto aki y e fracaso di e proyecto Ecogas den pasado. Den e tempo ey, mesun personanan cu awe ta manehando y ta den e “think tank” di Gobierno, a convence WEB Aruba NV pa gasta 17 miyon florin den tuberianan bou tera pa trece gas.
E resultado? E tuberianan ey nunca a transporta ni un solo centimeter cubico di gas. Un inversion di 17 miyon cu a bira un fracaso total y cu pueblo mester a paga den su recibo di awa. Awe, ta parce cu e mesun grupo ta “aventurando” atrobe cu tuberianan bou tera y tecnologia bieu, sin un garantia real di exito. Negoshi pa ken ?
Analisis: Vision pa 2050 of djis un solucion pa awe?
Maske e plan di Gobierno por costa menos den e prome fase, nos mester puntra nos mes: Esaki ta loke Aruba mester pa ta cla pa aña 2050, 2060 of 2070?
Sostenibilidad: Mantenimiento riba tecnologia di 1972 no ta sostenible a largo plas.
Malmok y Wetlands: Manda awa pa area di Malmok sin un purificacion di nivel halto por crea un desaster ecologico den un di nos areanan mas balioso pa turismo y naturalesa.
Gasto Dobel: Hopi biaha, ora bo scapa cen awe riba un fundeshi mal traha, mañan bo tin cu gasta dobel pa drecha e daño.
Aruba no por permiti un otro “aventura di tuberia”. Un vision di 1972 no por soluciona e retonan di un Aruba moderno cu miles di kamber extra. Si e fundeshi di nos infraestructura ambiental faya, nos pilar economico principal lo paga e prijs.
No solamente esaki, tambe tin mas proyecto fracasa di WEB, manera flying wheels pa warda coriente. A gasta 70 miyon florin sin un dia e projecto a mira lus di dia. Pues, si ta e mes personanan aki ta na cabes, anto e futuro lo tq hopi scur.
