Dialuna ultimo, Gobierno di Aruba, CEDE ARUBA y 11 centro- y organisacion di bario a firma un MOU pa ancra e acuerdo den conhunto pa e programa y proyecto den barionan di Aruba. Cu E MOU aki ta formalisa e intencion di tur partido pa traha mas estrecho cu otro y e compromiso di continuamente mehora bienestar den e barionan di Aruba. Banda di esaki, e intencion ta pa diversifica e programa pa diferente grupo y meta, pa intensifica colaboracion cu partnernan den comunidad y pa mehora e colaboracion entre e centro- y organisacionnan di bario mes. E programa aki lo yama BARIONAN UNICO y lo tin un duracion di 5 aña.
E encuentro y firmamento a tuma lugar na bestuurskantoor den sala bieu di ministerraad. E ambiente tabata sumamente positivo. E centro- y organisacionnan di bario cu tabata presente y cu a firma e MOU ta: Fundacion Centro di Bario Ayo y Besindario, Stichting Centro di Bario Brazil, Buurt- en Sportvereniging Dakota, Stichting Centro di Bario Noord, Fundacion Centro Famia Piedra Plat, Stichting Centro-Bario Lago Heights, Stichting Buurtcentrum Piedra Plat en omgeving, Stichting Centro di Bario Playa Pabao, Stichting Centro di Bario Santa Cruz, Stichting Recreatie- en Buurtcentrum Savaneta y Stichting Centro di Bario Tanki Leendert.
E MOU ta stipula cu durante e proximo añanan, den cuadro di e proyecto BARIONAN UNICO lo mehora capacidad di personal di e centro- y organisacionnan di bario, pa asina por crea y coordina programa di actividad. Tambe lo evalua regularmente e necesidadnan cu tin den tur barionan, unda por haci uso di e apoyo di otro partnernan tambe den comunidad. A base di esaki, lo desaroya y ehecuta programanan anual cu meta di logra un mehoracion di e programa continuo y aumento di participante den e actividadnan. Banda di esaki lo mehora e accesibilidad y visibilidad di e organisacionnan, individual y colectivo, lo haci esaki den tal manera cu comunidad semper lo keda bon informa riba e programa y actividadnan. Por ultimo, intencion ta pa amplia y diversifica e financiamento di e programa y e actividadnan manera por. Intencion ta pa envolví tur partner di financiamento nobo local y internacional, y lo mester crea modelonan di recurso.
CEDE ARUBA lo tin e tarea di provee asistencia na e organisacionnan pa por realisa nan metanan/logronan menciona anteriormente. E asistencia aki lo ta mas tanto posibel ‘traha na midi’ segun necesidadnan y e situacion actual di cada organisacion. Tambe CEDE ARUBA lo maneha fondonan adicional pa asina crea un sistema mas facil di duna y controla financiamiento den un forma transparente. Relaciona cu e tarea aki, Gobierno di Aruba a compromete su mes tambe pa duna fondonan adicional pa e siguiente 5 ańa.
Un palabra di pabien di CEDE ARUBA pa tur partido cu a firma e MOU. Despues di esaki, lo cuminsa haci e proyecto operacional. Dia 21 di oktober, CEDE ARUBA hunto cu e centro- y organisacionnan di bario lo organisa un presentacion di intercambio cu profesionalnan den area social, cultural y educativo cu lo atende cu e meta di e programa BARIONAN UNICO. Intencion ta pa traha un colaboración entre organisacion cu ta activo caba den barionan di Aruba of cu esnan cu por tin ideanan constructivo pa participa.
