ORANJESTAD – Manera ya caba a wordo anuncia, mas di 100 mucha a participa na e concurso di kleur “Stima Bo Mascota” 2021. E concurso tabatin e meta pa sigui conscientisa, specialmente nos muchanan, cu nan mascota merece bon cuido, y cu ta masha normal pa laga sterilisa bo mascota. Dialuna 6 di december, 7 mucha ganador a bay Bestuurskantoor pa nan ricibi nan premio.
Compra/Purina cu a haci e concurso aki posibel, tabatin un basket grandi pa tur 7 mucha, y mas den siman nan por pasa Compra buska un regalito pa nan mascota tambe.
Ademas di representantenan di Compra, Armando Goedgedrag cu a diseña e imagen cu e muchanan a kleur, Prome Minister Evelyn Wever-Croes, Minister di Naturalesa y Bienestar di Animalnan en general, Ursell Arends y Minister di Enseñansa Endy Croes tabata presente y e ministernan tambe tabatin un regalito pa e muchanan.
E top 3 di e scolnan participante, esta Agnes Kleuterschool (54%), Imelda Kleuterschool (18%), y Ayo Kleuterschool (15%) a ricibi un reconocemento pa e gran participacion na e concurso educativo aki cu ta na bienestar di nos mascotanan.
Dia internacional di mucha, diasabra dia 20 di november, e ganadonan a wordo anuncia riba e pagina di FaceBook Stima Mi Mascota. Ta trata di Levi Kelly y Cristofer Mestizo di 4 aña, Sofia Buunen y Nivlainne Laclé di 5 aña, y Kailong Lie Kwie, Candice Reyes y Amy Koolman di 6 aña. Masha pabien muchanan!
