Ta berdad cu nos Dios ta un Dios di amor, un Dios di pas, un Dios di misericordia, un Dios di compasion, pero ora nos ta haci manera hende cu no kier tende, cu ta bay tur dia contra e berdad, cu ta trose e palabra di di Dios,y cambia e berdad di Dios pa un mentira, nos ta provoca e furia di Dios.
For di testament bieu, Dios a demostra esey, ora tabatin murmuracion, rebeldia , inmoralidad den e pueblo, y Dios a avisa Moises di locual tabata bay pasa si e pueblo no arepenti, Dios a bisa cu nan lo bay muri den desierto y esey a sosode tambe.
Awendia hopi hende ta kere cu pasobra nos ta biba den tempo di Gracia, hende por haci manera nan kier y Dios mester acepta tur clase di locura y rebeldia di nan banda.Esey ta un gran mentira, pasobra nos mester somete na Dios, tur momento y e temor di Dios mester goberna nos bida.Nos no por biba con cu ta mas.
Nos ta liber den Cristo pero no laga nos comberti nos libertad den libertinahe, haciendo cosnan contra e boluntad di Dios.
E palabra di Dios ta splica nos bon cla den Romanonan 2:5 : Ma pa motibo di bo capricho y bo curason cu no ta arepenti, bo ta montona furia pa bo mes, den e dia di furia y revelacion di e huicio husto di Dios,Kende lo paga cada ken segun su obranan.
Den Romanonan 1;18 Dios ta adverti: Pasobra e furia di Dios ta keda revela, for di cielo contra tur impiedad y inhusticia di hende cu ta oprimi e berdad, pa medio di inhusticia.
Hende cu sa locual ta bon pero keto bay ta scohe pa permanece den maldad, ta lanta e furia di Dios.
Chercha Dios, a bira algo na moda, haci bofon di Dios y kere cu lo no tin resultado , ta un engaño fatal, pasobra Dios no ta permiti ningun hende haci bofon di Dios.Tur locual cu hende sembra nan lo cosecha.
Nos salbacion ta cariño di Dios, pasobra pa gracia nos ta salba, door di Fe,ningun hende por cumpra salbacion, pasobra salbacion ta bini solamente ora nos kere den e Yiu unigenito di Dios, kende ta Cristo Hesus.
Maldad hopi biaha ta pone hende pensa cu nan mes ta Dios, ora nan ta haci cosnan contra boluntad di Dios, y e diabel ta pone nan kere cu nan ta grandi y poderoso y intocabel, pero nan ta lubida cu Dios ta Todopoderoso.
No tin poder aki na mundo , cu por compara cu e poder di Dios, Dios ta soberano, y a yega tempo pa tur hende realisa esey.
E palabra di Dios ta bisa cu tur rudia mester dobla, y tur lenga mester confesa cu Cristo ta Señor pa gloria di Dios Tata.
No participa den e obranan infructifero di scuridad,no laga ningun hende gaña boso cu palabranan bano,pasobra ta pa motibo di e cosnan aki e furia di Dios ta bini riba e yuinan di desobedencia.( Romanonan 5:6-11).
Sinembargo , e fundeshi firme di Dios ta para, seya cu e inscripcion aki:Señor conoce esnan cu ta di dj’E. Y laga tur esnan cu ta menciona nomber di Señor abstene di maldad.
Tempo di haci wega a pasa, pasobra ta dificil pa nos ta conoce Dios, y keto bay e curason y e mente ta yena cu maldad. Ta tempo pa arepenti y busca cara di Dios, y ricibi misericordia di Dios.
No lubida, laga nos cana den e lus di Dios.
Sinceramente, Pastor Marcel Balootje.
