Na vispera di e celebracion di Himno y Bandera nos ta recorda e co-compositor di nos Himno Aruba Dushi Tera y alabes Aruba su musico completo sr. Rufo Wever. Den e documentario ‘Musica ta mi bida,’ nos ta sera conoci mas di acerca cu Rufo su pasion pa musica, su amor pa Aruba y tur su esfuersonan pa documenta e musica di hopi otro musico Arubano.
Rufo tabata un musico completo
Aruba conoce hopi musico talentoso y sr. Rufo Wever tabata un di nan cu tabata un ‘musico completo’. Rufo tabata domina diferente instrumento, tabata compone aregla y tabata skirbi partitura, un don cu tabata distingi Rufo fo’i demas musico di su tempo. Danki na Rufo, awe nos tin partidura di hopi musica tipico di Aruba, ya cu Rufo a percura pa documenta musica di hopi otro musico di su tempo. Rufo a percura tambe pa e partidura di nos musica di Cah’i Orgel y di nos Dande di fin di aña.
Rufo su amor pa Aruba tabata grandi
Hopi cantica cu Rufo a compone tabata hiba e nomber di Aruba aden. Arubanita, por ehempel ta un cantica hopi conoci. Su amor pa nos Aruba a hiba Rufo pa ta co-compositor di nos Himno Aruba Dushi Tera. Hunto cu e musiconan Padu Lampe y Lio Booi, Rufo a percura pa etala e cancion popular “Aruba Dushi Tera’ pa esaki keda resona como e Himno di Aruba.
E documentario di Rufo Wever ‘Musica ta mi bida’
Riba iniciativa di famia di sr. Rufo Wever, sra Vivian Wever hunto cu sr. Norman Thijsen di SkyTelevision a percura pa produci e documentario ‘Musica ta mi bida.’ Di e manera aki nos por keda recorda Rufo como e musico completo di Aruba y nos yiunan por keda inspira pa e musico cu Scol di Musica Rufo Wever ta hiba su nomber. E invitacion ta pa sintonisa e bunita documentario aki cu lo pasa dia 17 di maart na Nos Isla TV na canal 23 y pa Diatio TV Canal 48 pa 7 pm. Minister Maduro ta gradici famia Wever, SkyTelevision, tur persona y instancia cu a colabora pa asina conserva pa posterioridad e historia di nos musico completo sr. Rufo Wever.
