Diabierna mainta Crisis Team, por medio di Prome Minister a anuncia medidanan nobo na Aruba, cual entre otro ta cu lo prohibi bandanan musical y gaitanan pa duna presentacion, y a reduci presentacion musical solamente na tres musico paden y tres musico pafor.
Den mes rosea Prome Minister di Aruba a bisa cu e clusternan of e contagionan cu tini actual ta procedente di famia, oficina y esnan cu a bolbe bek di viahe.
Na ningun momento Prome Minister den nomber di Crisis Team a informa cu por tin un brote causa pa Musiconan, of pa cualke presentacion di banda musical of gaita.
Pa e motibo aki, Sr. Ofo Escudero, den representacion di Entertaintment 2020 a acudi awe pa papia cu e cabesante di Crisis Team, Sr. Rino Hermans, pa asina atende nan riba nan blunder cu nan a ocaciona.
E blunder ta asina grandi cu Ofo Escudero ta preparando caminda pa corte, pa asina busca claridad, con por ta posibel cu Crisis Team ta actua descabyea, unda kier manda musiconan atras, bolbe prohibi nan, pero ningun caminda Crisis Team a anuncia cu na tal sitio, tal agrupacion musical a causa un brote di virus.
Esaki pues ta algo totalmente inhusto y musiconan no ta accepta e decicion sin base aki y a exigi di e cabesante Sr. Hermans, pa nan corigi nan blunder, corigi nan error, y kita e medida contra musico.
Si no bini un contesta rapido riba esaki, e ora ey lo bay hiba e caso corte, pasobra, si Crisis Team por medio di Prome Minister mes ta informa cu e brote principal ta den famia, oficina y esnan cu yega bek Aruba, e ora con ta posibel? Ta ken a chupe di su duim pa bolbe castiga musiconan?
Si pa otro siman diaranson no corigi e desicion aki, of no bini cu prueba, ta di unda y con a basa e medida aki, e ora ey lo bay corte.
