Na Armand Hessels: Un acuerdo firma bao menasa, ta un consensus ficticio

0
884

Na Armand Hessels, e lobbyista (chupador) di Hulanda, cobrando 100 mil florin:

TA BO OPINION SO TA CONTA ??

Bo kier Hulanda bati Aruba pa firma,   manera bo tata Cor a batibo ?

Un reaccion riba e ultimo articulo titula Golpi di Gracia,  skirbi pa e lobbyista di Hulanda, Armand Hessels, cobrando 100 mil florin di Gobierno Hulandes, via Gobierno di Aruba, p’e pinta bunita e abuso cu Hulanda ta comete contra Aruba.  Un acuerdo firma bao menasa, ta un consensus fictisio!  

Nenga di firma:

Segun Hessels su ponencia, cu Gobierno di Aruba lo ta den un impase cu Gobierno di Hulanda, debi na e hecho cu Gobierno di Aruba a nenga di firma e acuerdo cu Hulanda.   Esaki ta un ponencia totalmente robes,  pasobra no ta trata aki di ningun impase.   No tin impase!    Loke no tin ta consensus!   Articulo 38 di statuut ta papia bon cla:  Consensus!

Prome Minister di Aruba a splica na multiple ocacion, cu e ta sigui na mesa cu Hulanda, pa asina sigui pidi Hulanda pa coopera y traha hunto cu Aruba,  y NO ne forma colonista,  di pone TRES HULANDES NA CABES.

Hessels no tin ningun autoridad ni tin ningun representacion pa papia di Autonomia: 

Cu e acuerdo ‘sin consensus’, ta atacha nos autonomia,  ta un berdad. Tur experto a bisa esey. Ya por a mira cu pa por a ricibi e prome y di dos tranche,  ya caba Hulanda a bati nos,  pior cu Cor bo tata a batibo, dia ba haci malamucha.  Hulanda a corta AZV cu 35 miyon abruptamente, y ken ta sufri? PUEBLO! Kisas e sentimento di e bati ey,  ainda por ponebo reacciona,  y pensa mas leu cu bo nanishi.  No ta pasobra cu abo ta wordo paga 100 mil,  bo mester papia di autonomia, cu abo no a lucha pe.  Es mas,  dia Aruba a haya status aparte,  parce ba bay biba na Hulanda!  

Segun Hessels: No tin manera di sobrebibi bou di e circumstancianan actual sin e coperashon di ‘hende/pais di afo’

Manera Hessels mes a menciona,  Aruba mester di cooperacion.   Cooperacion no nifica cu nos mester entrega e pais na TRES HULANDES,  sinta den nan oficina na DEN HAAG,  pa nan run e pais aki.  
Aki ta e unda e groceria ta cuminsa contra Aruba!   Kier recolonisa nos isla, hinke den man di Gobierno Hulandes, unda Minister di Hulanda ta bira baas den cas,  y na unda cu TRES HULANDES ta bay rindi cuenta na TWEEDEKAMER.     Armand, bo mester compronde cu esaki no ta cooperacion,  sino RECOLONISACION.   Dicon bo no ta manda carta pa pidi Hulanda, pa “calm down” y ban yega na consenus di berdad?  

Cambio di palabrashon riba prestamo di 3 pa 5:

E cambio di palabracion di Hulanda riba e prestamo di 3 pa 5 no ta e prome ves cu Hulanda a haci cambio.  El’a haci hopi hopi mas cambio.    Te hasta Hulanda su ambtenaarnan tabata asina bruha,  cu nan no tabata sa mes cu e status di Aruba ta otro for di Curacao y Sint Maarten.   Si Gobierno di Aruba a just “firma pa caba”,  firma den pura,   lo tardi of tempran,  nos lo a haya nos den problema cu Hulanda y keto bay esaki ta e ‘’confiansa” cu Hulanda ta duna,  esta cu nan ta inconfiabel.  


Confirma pa Banco Central: Reservanan di Aruba ta na piek di mas halto “ 10 luna di imporatacion”:

Pa proba con mal informa Armand Hessels ta,   recientemente Banco Central a publica un relato,  unda nan ta afirma cu nan maneho monetario,  dor di bini cu medidanan, a percura pa e reservanan di Aruba alcansa un piek hamas antes visto, di 10 luna di importacion,  mustrando asina con stabiel Aruba su florin cu dollar.    Banco Central a bisa: “Consecuentemente, e reservanan oficial y e reservanan internacional a yega te na, respectivamente, Afl. 2.187,5 miyon y Afl. 2.257,8 miyon riba 28 di augustus 2020, cual ta pieknan mas halto cu a wordo registra. Di e manera aki e nivel di reservanan ta cubri mas cu 10 luna di importacion. Ademas, e reservanan ta cubri 104,4% di e nivel optimal basa riba e metrico recien aplica door di FMI, esta e asina yama ‘Assessment Reserve Adecuacy’ (ARA).”

Absurdes:   “Si Hulanda retira”…. 

Pa mira con Armand Hessel ta sigui slijm cu Hulanda,  te hasta e kier tira un menasa riba pueblo of riba Gobierno,  cu Hulanda por kita su “sosten” ( lesa garantia) na Aruba y cu esey lo implica cu Aruba lo keda pega, cu su ratingnan internacional.    Ta con Hulanda por kita su sosten?   Si acuerdonan existente cu Naciones Unidas,  cu paisnan colonisador HAMAS Y NUNCA por kita nan sosten for di islanan cu a haya autonomia,  pero tampoco e pais colonisador (Hulanda), HAMAS Y NUNCA por tuma su independencia.

Hulanda ta violando tur acuerdonan di Naciones Unidas:

Comosifuera poco,  Armand Hessels, lobbiyista di Hulanda, tambe ta apoya Hulanda, cu ta violando tur principio y acuerdonan haci den pasado y vigente awendia,  manera e “Declaration on the Granting of Independence to Colonial Countries and Peoples, General Assembly resolution 1514 (XV) of 14 December 1960”.  Act of self-determination.   Den esaki ta para enfaticamente,  cu un pais COLONIZADOR,  unda bes duna su isla e autonomia,  e no por kite bek di dje, tampoco interferi.   

Armand no por tapa SOLO cu un dede:

Cu poco conocimento di historia,  Armand mester por sa cu autonomia di nos pais, ta algo cu a cuminsa desde 1933 y a culmina te na 1986.  Ta un bataya largo e pueblo Arubano a hiba pa logra, cu nos por goberna e pais aki nos mes.    Nos ta dispuesto si pa ricibi tur sorto di cooperacion, tur sorto di control,  pero DICON kier persisti pa pone TRES HULANDES na cabes?       Y Armand,  manera “un rabo sushi” ta kere cu ta su opinion so ta conta?      Bin bij!    Y cuminsa na resepta opinion di otro!

LEAVE A REPLY

Please enter your comment!
Please enter your name here