Awe na Caminda Pa Mundial 2026 ta recorda seleccion di Brazil, kende na 5 ocasion a logra bay cu e titulo maximo.
Brazil tambe ta e unico seleccion cu a participa na tur mundial, for di su comienzo na 1930 te cu awor mundial 2026.
E historia di Brazil na Mundial 1930 na Uruguay no a cuminsa bon y a wordo elimina den fase di grupo.
Pa loque ta trata Mundial 1934 na Italia, Brazil ta avanza pa e siguiente buelta, pero ta keda elimina den round di 16 contra di Spaña.
Na 1938 Copa Mundial a tuma lugar na Francia y aki seleccion di Brazil ta yega semi final y ta cay venci contra di Italia.
Brazil ta gana Polonia den e wega pa di tres y cuater lugar cu score di 6-5 y asina ta keda na di tres lugar.
Pa motibo di segunda guerra mundial, campeonato mundial no a continua na 1942 y 1946.
Na 1950 Brazil tabata organizador di Copa Mundial, den Stadion Maracana e final a tuma lugar unda cu Brazil a enfrenta Uruguay.
Fanaticonan a yena Stadion Maracana cu casi 200 mil pa mira nan seleccion bay cu e titulo, pero Uruguay a percura pa e “Maracanazo” y ta logra gana e titulo ganando 2-1 y asina Brazil ta keda sub campeon.
Mundial 1954 a tuma lugar na Swisa, Brazil ta keda elimina den cuart final contra di e poderoso seleccion di Hungria cu score di 4-2, e wega aki ta ser recorda como e “bataya di Berne”
Den e mundial aki tambe Brazil ta cambia di color di uniform di blanco cu blau pa nan actual color di uniform geel cu berde.
Mundial 1958 a tuma lugar na Swecia, aki Brazil ta introduci un hungador di apenas 17 aña, su number Edson Arantes Do Nacimento mihor conoci como Pele.
E hungador aki a resulta esun di mas grandi tambe pa loque ta historia di Brazil den futbol, Brazil ta logra avanza pa e gran final y ta logra gana pa prome biaha e campeonato mundial cu score final di 5-2 caminda cu Pele ta anota 2 gol den e gran final.
Celebracion na Brazil tabata sin limite, Brazileño nan a subi caya y celebra cu nan heroe Pele.
Mundial 1962 a tuma lugar na Chile, aki un biaha mas Pele tabata forma parti di seleccion, pero apenas den dos wega a sufri un lesion grave y no por a hunga e resto di torneo.
Pero hopi di esnan cu a forma parti na 1954 tabata tey, manera Garrincha, Vava, Zagalo y pa re emplaza Pele nan a trece un otro hungador, Amarildo kende a bira clave pa Brazil a yega su di dos final consecutivo.
Den final Brazil ta derota Czechoslovakia cu score final di 3-1 y asina ta logra gana su di dos titulo consecutivo di Copa Mundial.
Mundlal 1966 a tuma lugar na Inglaterra, aki un biaha mas Brazil a yega como favorito pa bay cu e titulo, pero a keda elimina den prome fase di grupo.
Siguiente Mundla tabata Mexico 1970, aki a bin cambio di entrenador unda cu un ex hungador Mario “Lobo” Zagalo ta tuma riena di seleccion di Brazil.
Brazil ta logra elimina campeon di 1966, inglaterra y ta topa cu Uruguay den semi final.
Uruguay ta logra bay ariba den e wega aki y un sentimiento terribel a cay ariba Brazil, mester a pensa di nobo, pero casi na final di prome tempo Clodoaldo ta empata e wega.
Den di dos mitar Jairzihno ta haci e wega 2-1 y despues Rivelino ta anota e di tres gol pa asina “Changa E Diabel”
Den gran final Brazil ta gana Italia 4-1 cu golnan di Pele, Gerson, Jairzinho y Carlos Alberto pa asina bira doño tambe di e trofeo Jules Rimet.
Mundla 1974 a tuma lugar na Alemania, Brazil apenas a presenta cu un seleccion modesto pa e torneo aki, nan no a conta e biaha aki cu Pele, Gerson, Carlos Alberto y Clodoaldo y ta bay venci contra di Hulanda den semi final cu score 2-0.
Mundial 1978 a tuma lugar na Argentina, un mundial cu hopi controvercial pa motibo cu Brazil no a perde ningun wega, pero e tempo ey tabata hunga cu averahe di gol y Brazil no ta yega final y ta hunga pa di tres y cuater lugar contra di Italia y ta gana e wega aki 2-1 y asina ta keda na di tres lugar.
Despues di e mundial aki, seleccion di Brazil ta cay den un sequia total, ta wordo elimina na mundial di Spaña 1982 contra di Italia, 1986 na Mexico ta wordo elimina pa Francia y 1990 na mundial di Italia ta wordo elimina pa Argentina.
1994 mundial a tuma lugar na Estados Unidos (USA), aki Brazil a presenta cu un seleccion bastante fuerte, y ta logra pasa di e prome buelta cu hopi facilidad, e wega di mas fuerte cu Brazil a encontra tabata contra di Hulanda caminda a gana cu score di 3-2.
Den gran final Brazil a enfrenta Italia pa di 2 ocasion y pa prome biaha den historia un final di Copa Mundial ta wordo dicidi pa tironan for di punto penal, Brazil ta logra gana su di 4 titulo ganando esaki cu score di 3-2.
Hungadornan clave pa e seleccion aki tabata Romario, Alair, Marcio Santos, Taffarel, Bebeto, Mazinho, Mauro Silva y su entrenador tabata Carlos Alberto Parreira y su asistente tabata Mario “Lobo” Zagalo kende ta bira e unico persona pa gana 4 titulo mundial, 2 como hungador, 1 como entrenador y 1 como asistente.
Mundial 1998 Brazil ta yega final contra di Francia, pero ta perde final aki cu score 3-0 y asina ta keda sub campeon.
Mundial 2002 a tuma lugar pa prome biaha en continente asiatico, organiza pa 2 pais, Korea y Japon, Brazil pa e torneo aki sigur no tabata favorito, nan tabata tin un eliminatoria no di custumber y ta clasifica riba ultimo dia di eliminatoria, pero ora cu a yega mundial e monster di Ronaldo a spierta y ta logra anota 8 gol den e torneo y den gran final ta logra anota 2 gol pa derota Alemania 2-0 y asina gana nan di cinco titulo di Copa Mundial.
Despues di e mundial aki Brazil no a yega logra final mas, na mundial 2014 nan a sufri nan peor derota di historia cu score di 7-1 contra di Alemania y na mundial 2018 y 2022 ta wordo elimina den cuart final.
E mundial aki nan no ta favorito pa gana mundial tampoco, pero pa prome biaha den historia nan tin un entrenador cu no ta di Brazil, cu ta Carlo Ancelotti di Italia.
Den proximo edicion di na caminda pa mundial, lo trece historia di otro seleccion.
—–
