Secretaria di Cultura di Mexico a presenta dialuna e actividadnan cultural di e asina yama Mundial Social, den cuadro di e proximo Copa Mundial di FIFA. Entre e medidanan, a destaca instalacion di arconan di siguridad y desplega di mas elemento di Guardia Nacional na e zona arkeologico di Teotihuacan, caminda un luna pasa tabatin un tiramento mortal.
Coordinador nacional di Instituto Nacional di Antropologia y Historia (INAH), Antonio Huitrón, a splica cu e sitio arkeologico ta spera un aumento di 35 porciento den fluho di bishitante durante e evento di futbol. A pesar di e pronostico aki, e personal di custodia di INAH a keda mescos cu 49 persona for di e incidente unda un turista Canandes a perde su bida, pero a duna di conoce cu e refuerso ta bin di Guardia Nacional y instalacion di shete arco di siguridad na e cinco portanan di e zona.
E personal aki lo encarga tambe cu vigilancia di e museo nobo di “Grandeza Teotihuacana” cu lo habri pronto den e compleho, sumando un total di tres espacio di museo den e luga. Gobierno Mexicano a inverti mas di 37 miyon peso pa drecha e accesonan, museonan y señalisa di Teotihuacan.
Di su banda, secretaria di Cultura, Claudia Curiel de Icaza, a splica cu e Programa di Accion di Mundial Social a conta cu un inversion total di mas di 398 miyon peso. Cu e fondo aki, a restaura 46 zona arkeologico, 15 museo (incluyendo Museo di Antropologia y Palacio de Bellas Artes) y 12 juego de pelota. Ademas, lo ofrece 281 actividad cultural na 11 estado di e pais, di cual 170 lo ta concentra na Ciudad de Mexico, sede inaugural di Mundial. E programacion ta inclui presentacion di arte, exposicion temporario y rutanan di muralismo Mexicano.
E Mundial Social a wordo anuncia na aña 2025 pa presidente Claudia Sheinbaum cu e obhetivo di uza e Copa del Mundo pa mustra e herencia cultural di e pais. Mexico lo fungi como escenario pa 13 partido di e torneo for di dia 11 di juni te cu 5 di juli, y oficialnan ta calcula cu e pais lo ricibi mas di 5.5 miyon bishitante.
