Na Hulanda a aumenta “zorg” cu 7 miljard y na Aruba Knops a exigi pa corta 35 miyon den AZV

0
371

Parlamentario Endy Croes: Hulanda ta aumenta “zorg” cu 7 miljard

Militair Knops y Hulanda ta exigi pa corta 35 miyon den AZV mei mei den Covid

Parlamentario Endy Croes a ta keda sorprendi cu e desicionnan unilateral di Hulanda y cada dia e desicionnan descabeyanan aki ta briya mas y mas causando dolor na henter un pueblo. Hulanda durante negosacionnan andando a exigi Aruba pa corta den cuido esta den AZV un total di 35 miyon florin den 2020. Esaki hustamente mei mei di un Pandemia cual rond mundo a pone un peso y un carga extra riba cuido. Hulanda no a exigi Corsow tampoko St Maarten pa un reducion den cuido mientras na Hulanda mes hustamente aumenta presupuesto pa cu e Pandemia. Ta cu ki midi e Hulandesnan ta midi?

Presupuesto pa cuido na Hulanda lo ta 93 miljard Euro pa 2021:

Parlamentario Endy Croes ta splika cu el a tuma nota di e presupuesto di Hulanda pa cu 2021 cual a wordo entrega recien y ta notable cu Hulanda a aumenta e presupuesto 2021 den comparacion cu 2020 cu 7000 miyon Euro esta 7 mijjard Euro. E presupuesto total pa cu 2021 ta ancra na 93.000 miyon Euro of 93 miljard Euro pa cuido. A specifica cu 350 miyon Euro ta presupuesta pa reinforsa capacidad den zorg mientras 700 miyon Euro lo wordo inverti pa desaroya un vacuna contra corona virus y alaves 300 miyon Euro lo ta presupuesta pa ampliacion di camanan di ICU. ( Intensive Care Unit).

Hulanda lo pone un Bonus di 500 Euro pa cada empleado den zorg:

Den e presupuesto por a mira tambe cu Hulanda a presupuesta un 500 Euro extra pa cada empleado den zorg como un Bonus pa cu 2021 mientras den 2020 lo duna cada empleado 1000 Euro como extra Bonus. Por a tuma nota cu Hulanda a paga den 2020 un suma di 800 miyon (netto) solamente na e extra Bonus y pa 2021 esaki lo ta 500 miyon (netto) como gratitud na e empleadonan den zorg cu a atende cu e corona virus. Pa e presion exceso door di Covid 19 a presupuesta 20 miyon Euro extra. Tur esaki mientras na Aruba Knops a haña di ta bon pa corta cu 35 miyon. Ra-Ra-Ra!

Zorgpremie lo aumenta cu 5 Euro pa luna averahe:

Di lokual por a revisa cu e “eigen risico” lo keda 385 Euro mientras e “zorgpremie” lo bira segun calculacionnan averahe 123 Euro cual ta un aumento di 5 Euro den comparacion cu aña 2020. Alavez e “zorgtoeslag” lo conose un aumento di 44 Euro pa alleenstaande y 99 Euro pa meerpersoonshuishoudens.

Tambe a presupuesta 200 miyon pa hendenan sin cas ( Daklozen):

Un total di 200 miyon Euro a wordo presupuesta pa aña 2021 pa personanan cu ta bibando riba caya esta personanan sin un dak riba nan cabez. Di acuerdo cu e spikacion den e presupuesto cu desde 2009 pa awor e cantidad di hendenan cu ta biba riba caya a mas cu redobla y a alkansa alrededor di 40.000 hende sin dak riba nan cabez segun informacion di CBS Hulanda. Awor ta e momento pa hasi inversionnan grandi pa corigi esaki y trese esaki bek na un nivel aceptabel.

Ta lamenta e na Aruba ta exigi pa corta 35 miyon:

Nos ta lamenta masha profundo con Hulanda ta preciona un isla chiquito manera Aruba di cual su entrada principal atravez di turismo a haña un golpi mortal door di e corona virus y den e momento di mas dolor ta preciona un gobierno, legitimo eligi pa pueblo,den un skina cortando den e “Aorta” esta cuido cual mester mantene nos pueblo na bida. Parlamentario Endy Croes ta splika cu aki si E ta mantene Militair Knops personalmente responsabel pa cada bida y bataya humano cu ser perdi durante e Pandemia aki.

LEAVE A REPLY

Please enter your comment!
Please enter your name here