E delegacion di Aruba, encabesa pa Prome Minister Mike Eman a continua cu diferente bishita y reunion na Hulanda. Dialuna, Prome Minister a hiba combersacion cu Caroline van der Plas, Lider di Fraccion BBB den Tweede Kamer.
Den un bon ambiente a papia riba pesca y e rol importante di e agricultor y criado di bestia na Hulanda como productor di alimento. A papia riba e historia di Aruba, como tambe e nificacion di e bishita na Hulanda pa pais Aruba.
Un di e puntonan cu sigur ta di interes ta esun di e bon comun, solidaridad cu e comunidad, mirando cu e nucleo familiar ta algo hopi importante riba Aruba, segun Caroline van der Plas a indica.
Di acuerdo tambe cu e pensamento cu no mester ta dependiente di gobierno, pero cu e comunidad tambe mester duna di su banda, teniendo na cuenta cu nan propio responsabilidad.
Como lider di Fraccion De BoerBurgerBeweging (BBB) , cual a keda funda dia prome di november 2019, nan a sostene diferente plan di desaroyo cu tin di haber cu agricultura y ta dispuesto pa brinda sosten cu e planificacion y/of ehecucion ora cu ta asina leu.
Caroline van der Plas ta di opinion cu e islanan den Caribe ta parti di Hulanda y como tal tin cu cuida y apoya nan. E sosten cu nan por brinda hopi biaha ta bin na momento cu ta ehecuta proyectonan manera expancion di waf, desaroyo den plantacion como tambe tecnologia cu ta eleva e suministro di alimento di e pais.
A remarca tambe riba e importancia grandi cu mester tin entre e gobierno di Hulanda y e gobierno di e islanan den Caribe, y cu e ta un derecho legitimo di por ta den dialogo cu otro y pa traha hunto.
Prome Minister Mike Eman a ricibi di parti di Caroline van der Plas un ‘boeren zakdoek‘ como obsekio, cu e colornan corespondiente cu e partido, normalmente nan ta di color cora y blanco pero como toke di atencion, a cambia esaki na berde cu blanco.
