Djadumingu mainta Wardakosta a señalá un kontakto sospechoso den serkania di Kòrsou. Despues di e detekshon e Sentro Marítimo Operashonal di Wardakosta a dirigí un unidat di Wardakosta den direkshon di e boto sospechoso i tambe inmediatamente a informá Kuerpo Polisial Kòrsou.
Una bes ku a yega na e sitio, Polis a mira tantu un boto sospechoso komo un outo sospechoso. Despues di a nota e outo sospechoso a bai mes ora na e sitio kaminda esaki tabata pará, pero e personanan ku tabata den e vehíkulo ya a baha bai laga e outo atras. Den e área kaminda e outo tabata pará Polis i Wardakosta a haña vários pakete ku supuestamente tabata kontené droga. Avion di Wardakosta tambe a keda desplegá pa bai en buska di e boto sospechoso den e area. En total a haña 22 pakete konteniendo un total di 713 kilo di droga, di kual 43 kilo mariwana i 670 kilo di kokaina, den mondi i riba laman. Den e área Wardakosta a topa ku un boto ku a senk, ku probablemente a ser usá pa transportá e droga. Kuerpo Polisial Kòrsou a konfiská e paketenan di droga i lo sigui investigá e kaso. E droga entretantu a ser destruí.
Wardakosta lo siguí patruyá pa asina kontrolá e fronteranan marítimo di Kòrsou. E patruyanan lo vigilá i protehá e fronteranan di transportenan di droga, trafikashon di hende i di arma. Abo komo suidadano alerta tambe por yuda Wardakosta. Na momento kubo mira algu sospechoso òf peligroso riba laman òf na kosta, bo por informá Wardakosta riba e number 913 òf via whatsapp 510 0913. E numbernan akí ta alkansabel di dia i anochi.
