Nos di Aruba Amateur Weightlifting Association a ricibi e noticia tristo cu e homber cu den su tempo tabata conoci como e persona mas fuerte di Aruba, a bay sosega. Como coleganan hisador kendenan semper a sigui su trayectoria di serca, nos kier kier conta en breve kende Higinio Alejandro “Patan” Farro tabata como weightlifter.

Comienso

E prome biaha cu Patan a participa na un competencia di peso tabata na aña 1964 na Aruba. Aki el a sali na segundo lugar. Pero despues el a bay laga tur hende atras.

Como cu na 1964 hopi hisador di peso na Aruba tabata di origen stranhero y como trahado na e refineria LAGO a haya lay off di trabou y mester a bolbe na pais di origen, e deporte di peso na aña 1965 a cay hopi. Pero Patan a sigui train y a sigui desaroya den e deporte di peso.

Training

Patan a yega asina leu como hisador di peso mientras e tabata mester train peso den un espacio chikito bou di tribunanan di actual Stadion Guillermo Trinidad (e tempo ey Wilhelmina Stadion). E lugar tabatin un solo porta, un bentana chikito y tabata sumamente calor y sin ventilacion adecua. E espacio di train tabata dispone di un solo platform riba cual 7 otro hisador tambe mester a train.

Patan semper a train sin guia di un entrenado profesional. E no a wordo brinda oportunidad di bay trainingscamp den exterior. Tampoco e tabata haya off di su trabou pa bay exterior pa competencia, pa haci esaki e mester a sacrifica su propio dianan di vakantie.

Logronan

Na aña 1970, cu Aruba den constelacion di Antiyas Hulandes, Patan a wordo selecciona pa representa Antiyas na Weganan Centro Americano y del Caribe (CAC) na Panama. Pero NAOC (Nederlandse Antillen Olympisch Comité) a nenga di paga su biahe pa esaki. Esey a haci cu Patan a dicidi pa e mes a paga su buelo. Akinan algun di su logronan internacional y local:

• 1970 – Weganan Centro American y del Caribe (Panama): Patan a logra sali na di 4 lugar den su categoria.
• 1971 – Weganan Panamericano (Cali, Colombia): Patan a resalta door di termina na di 5 lugar den su categoria.
• 1974 – Weganan Centro American y del Caribe (Republica Dominicana): Patan un biaha mas a logra di 4 puesto.
• 1978 – Weganan Centro American y del Caribe (Medellin, Colombia): Patan a logra medaya di brons pa Antiyas Hulandes.
• Patan tabata campeon di Aruba pa 14 aña consecutivo y di Antiyas Hulandes pa 9 aña consecutivo. 
• Den añanan 70 e tabata squat 600 liber, deadlift 700 liber, bench press 400 liber. E tabata kibra su propio record na diferente ocasion. 
• E record di Aruba cu tabata riba su nomber, snatch 275 liber y clean and jerk 352 liber na aña 1976 a permanece pa 40 aña prome cu na 2016 nan a logra kibra ambos record y tambe esun di total.

Reconocimento

Apesar di su resultadonan na e competencianan internacional aki, e no a wordo honra e tempo ey pa tur locual el a logra mientras e tabata un hisado activo. Basta aña despues cu e la retira di weightlifting, e la ricibi condecoracion di Cas Real, drenta den e Salon di Fama di Aruba y a ricibi Premio Santa Anna pa su meritonan cultural y den deporte di hisamento di peso.

Perdida

Cu fayecimento di Patan, Aruba a perde un tremendo hisador di peso cu a logra exitonan apesar di tur contratiempo y reto poni su dilanti. Pero mas cu tur cos Aruba Amateur Weightlifting Association ta lamenta di a perde un rolemodel y un tremendo ser humano.

Nos ta extende nos mas profundo condolencia na su señora, yuinan, nietonan y demas famia. Patan, danki pa tur loke bo a duna na Deporte di Peso na Aruba y Caribe. Descansa na pas.

Scirbi pa Emeterio “Theo” Bareño, pa Aruba Amateur Weightlifting Association.