Cu hopi tristesa, nos a despedi di nos amiga stima Justine Hart, Life Member y miembro di Women’s Club of Aruba (WCA) pa mas di 50 aña.
Despues cu el a casa cu Oscar (Nechi) Hart na aña 1970, Justine a haci di Aruba su cas. Poco despues di su yegada na Aruba, Mildred Harms a introducie na WCA, y dia 8 di februari 1971, el a bira miembro oficial. Asina Justina, miho conoci como Justine, a cuminsa un caminda cu lo dura henter su bida, yen di amistad, servicio y dedicacion.
Den e temponan ey, hopi miembro di WCA tabata bini for di diferente parti di mundo y a haya entre otro un sentido di pertenencia y comunidad. Justine a forma amistadnan profundo cu a dura varios decada, manera miembronan Jeannette Kort, Marie Thérèse Croes (efm), Raquel Perez, Raiza Wilson y hopi mas, E amistadnan ey a bira un di e regalonan mas grandi cu nos club a trece den su bida.
Justine tabata papia cu hopi cariño tocante e diferente workshopnan cu club tabata organiza. El a participa na actividadnan manera les di snorkel, costura, decoracion di bolo, y el a descubri talentonan cu probablemente nunca e tabata sa cu e tin. E tabata koester specialmente e recuerdo di decora e prome bolo di cumpleaño di su yiu muhe Alyssa, un creacion cu e mes a admiti, a sali ‘bastante bon’.
Su compromiso cu WCA a bay mucho mas leu cu simplemente participa n’e actividadnan. El a sirbi den directiva varios biaha: na 1974–1975 como responsabel pa e Directorio Telefonico di Club; na 1978–1979 como Presidente di e Comision Historico y Cultural; y na 1985–1986 como Miembro General den directiva bou di presidencia di Marie Thérèse Croes. Ademas, el a aporta activamente na diferente comision, incluyendo Comision Limpi y Study Group.
Na 1987, bida a presenta Justine cu un reto enorme ora su esposo a sufri un derame cerebral severo. Pa casi binti aña, el a dedica su mes cu amor, pasenshi y compasion incondicional na cuido di su casa. Aun durante e añanan exigente ey, su lazonan cu WCA a keda fuerte. Tur biaha cu tabata posibel, e tabata atende nos reunionnan general, caminda e tabata haya alegria, apoyo y animo den compania di su amiganan.
WCA semper a aprecia profundamente e generosidad di Panaderia Moderna. Nos ta corda cu gratitud e donacionnan di pan y bolo di “Nechi” pa nos actividadnan di club pa cu mucha- y hendenan grandi.
Riba 8 di februari 2011, despues di cuarenta aña como miembro fiel, WCA a honra Justine como Life Member. Tabata un reconocemento mereci pa su lealtad, su deseo di sirbi y e contribucion duradero cu el a haci na nos organisacion.
Door cu su salud a bay atras e ultimo añanan, esaki a impedi cu e por a atende nos reunionnan general, pero su amor pa su club nunca a mengua. El a sigui sostene e esfuersonan di recaudacion di fondo tur ora cu e tabata por, specialmente pa e proyecto di Dress a Child, cu tabatin un luga special den su curason. Yuda muchanan y contribui na comunidad tabata dun’e hopi satisfaccion, reflehando e espirito generoso cu semper a caracterisa su bida.
Ora nos ta mira bek riba e añanan cu Justine tabata den WCA, nos curason ta yena cu gratitud. Nos ta agradecido pa cu su servicio na comunidad, su amistad, sinceridad, sonrisa, atencion pa otro y e recuerdonan incontabel cu nos a comparti. Su legado ta sigui biba den e bidanan cu el a toca y den e amistadnan cu el a cultiva.
Na su yiu muhe stima Alyssa, na su famia y tur esnan cu a stima Justine, nos ta expresa nos mas profundo condolencia. E miembronan di WCA ta comparti boso duelo y ta celebra un bida biba cu amor, generosidad y proposito.
Laga e recuerdonan cu nos ta koester trece consuelo na nos curason. Laga su ehempel sigui inspira nos, y laga nos honra su memoria. Cu nos amiga Justine por sosega na paz!
