Durante e Accion di Bario cu a tuma luga diahuebs mainta na Rooi Afo y Seroe Preto, Prome Minister Mike Eman a bishita dos iniciativa local cu ta muesta con produccion local y cuido di naturalesa por bay man den man.
Patia local fresco
Un di e bishitanan durante e recorido tabata na Agro Tech, unda David Rodriguez, kende ta fungi como tecnico agricultor y tin dos aña trahando cu e empresa, a comparti informacion tocante e produccion di patia. Segun Rodriguez, actualmente e plantacion ta logra un cosecha cada 60 dia. E meta ta pa sigui amplia y sembra mas pa logra mas cosecha mensualmente y asina aumenta e disponibilidad di patia local durante henter aña. Dependiendo di tamaño y variedad, e consumidornan por haya un producto fresco cultiva na nos propio tera. Prome Minister mr. Mike Eman a gradici e ekipo di Agro Tech p’e trabou cu nan ta haci pa fortalece produccion local y contribui sembra fruta riba nos propio baranca.
Abehanan ta importante pa nos flora
Durante e mesun bishita, Prome Minister a papia un rato cu Ruben Montilla di Aruba’s Bee Haven. Montilla tin 7 aña den negoshi di producto di abeha y a comparti su experiencia tocante e importancia di cuida e poblacion di e abehanan rond di nos isla. Segun Montilla, awa y flor ta indespensabel pa produccion di honing. Sin suficiente awa no tin suficiente flor, y sin flor e abehanan no por produci honing. El a splica cu abehanan ta hunga un rol importante den reproduccion di varios sorto di mata y den mantene nos naturalesa saludabel. Montilla a comparti tambe cu e abehanan cu ta biba na Aruba a conserva varios caracteristica unico. Segun Montilla, Aruba por hunga un rol importante den futuro si bin un reduccion di poblacion di abeha mundialmente. Su productonan di abeha, manera honing y hopi otro mas ta disponibel na varios supermercado y hasta den luga di souvenirs pa turista.
Produccion local ta beneficia comunidad
E bishitanan durante Accion di Bario a mustra con iniciativa local por aporta directamente na comunidad. Ademas di produci fruta y berdura y otro producto local, e tipo di iniciativa aki ta crea actividad economico y ta contribui na un Aruba mas fuerte y miho prepara pa eventual scarsedad di fruta of berdura den futuro. Gobierno ta sigui reconoce e balor di nos empresarionan cu diariamente ta trahando pa tin produccion local,cuida nos naturalesa y crea oportunidad di empleo pa nos pueblo.
Esaki ta confirma tambe e importancia di e vision cu Gabinete AVP-Futuro tin pa reforestacion y pa amplia mas area berde rond di Aruba. A traves di diferente iniciativa pa planta mas mata y promove cuido di nos naturalesa, Gobierno kier contribui na un Aruba cu mas mata y mas sombra.Segun Prome Minister Mike Eman, accionnan manera esaki ta mustra cu produccion local, cuido di naturalesa y desarayo economico por bay man den man pa
beneficio di nos comunidad.
