ORANJESTAD – Recientemente Parlamentario Stefany Sevinger a sali den medionan di comunicacion pa purba bende un storia unda e ta pretende cu a “scapa” Aruba di un debe di 250 miyon florin door di stop e proyecto di AWSS. Sinembargo, ora analisa e realidad operacional di Aruba, e declaracionnan aki no solamente ta falta di base, pero nan ta sconde e berdad preocupante: e mesun maneho cu su tata, ex-minister Benny Sevinger, a laga atras ta e causa principal di e caos cu nos ta biba awe.
Ken a crea e caos?
Pa compronde e situacion di e planta di purificacion na Bubali (RWZI), mester bay bek na e origen. Tabata precisamente den tempo cu Benny Sevinger tabata minister, cu a firma permisonan pa mas di 7,000 kamber di hotel extra. Esaki a wordo haci sin pensa riba e infraestructura necesario pa carga e impacto ey.
CAFT a stop inversion di 16 miyon na 2022 y pidi aanwijzing:
Si nos tin AWSS awe, ta pasobra cu na 2022, CAFT a exigi pa Aruba schrap e inversion di 16 miyon florin. E tempo ey hasta a manda pidi aanwijzing. Pe motibo ey a bini cu un stratega nobo y asina AWSS a sali.
E planta cu tin awe ta di aña 1972 cu no por cu e carga e cantidad di awa mas. Gabinete Wever-Croes II a busca un solucion structural pa medio di AWSS (Aruba Wastewater Sustainable Solutions), un entidad privatisa cu mester a busca su mesun fondonan (mescos cu WEB of Elmar) pa construi un planta nobo sin usa placa di pueblo.
E “spaarmento” di Sevinger ta un bom di ora
Stefany Sevinger ta broma cu a stop e inversionnan di 200-250 miyon florin pa enfoca riba “mantenimento”. Aki ta unda e peliger ta sinta:
4,000 kamber nobo ta habriendo: por mira constructionnan di Benny ta lantando den tur skina. Mas y mas kamber di hotel. E herencia di Benny.
Mantenimiento so no ta basta: Bo no por purba drecha un machine bieu di 1972 pa e haci trabao di un planta moderno ora e demanda subi cu miles di kamber mas.
Colapso Ambiental: Door di no inverti den un planta nobo cu capacidad 4 biaha mas grandi (manera e plan di AWSS tabata stipula), e coalicion actual ta hibando Aruba den direccion di un desaster ambiental y turistico ora cu e Bubali Plas no por wanta e presion mas.
Ademas, e berdad tocante AWSS ta simpel:
- No tabatin debe ainda: AWSS tabata den fase di negociacion. No por scapa algo cu no a wordo firma ainda.
- Turista ta paga: E plan tabata pa e $20 cu turista ta paga na entrada sirbi como garantia. Pueblo no mester a paga nada extra.
- Transparencia: E ley di AWSS a pasa den Parlamento di forma legal y publico.
Na final: Un vision corticto cu lo costa caro
Enbes di ataca un solucion cu a wordo crea pa coregi e fayo di su mesun famia politico, Stefany Sevinger mester splica pueblo: Kico lo pasa ora e 4,000 kambernan ey habri y Bubali plas rementa ?
E “spaar” di 250 miyon cu e ta menciona awe, por bira e perdida di biuones di florin den turismo mañan si e cos colapsa. Mantenimiento riba un sistema bieu no ta un solucion; e ta simplemente un pleister riba un herida mortal cu su propio partido a causa.
Pa mas informacion real y alcaso, keda pendiente pa nos proximo edicion.
