Scuridad ta avansando, y purba tapa e berdad, pero nunca esey lo tuma lugar, pasobra scuridad no por vence luz, pasobra lus ta di Dios, pasobra Dios ta lus y den dj’E no tin nada , nada di scuridad.
Si nos ta cana den scuridad y bisa nos ta cana cu Dios, nos ta ganja nos mes, y esey ta pasa hopi awendia, pasobra hopi hende a perde temor di Dios.
Si bo tin cu perde amistad di hende, pa motibo di bo amor y respet pa Cristo Hesus, anto mihor bo perde e amistad y keda fiel den Senjor, pasobra E si ta balora bo amistad, E ta nos amigo pa semper.
Den Mateo 24 Hesus ta papia di senjal di ultimo tempo, cual awor aki a bira realidad di ultimo tempo, E a bisa cu esnan cu ta predica su nomber, esnan cu ta para pa e berdad di Cristo tur dia, no esnan cu ta sirbi Senjor pa un temporada, y otro temporada nan ta los laga bay y laga e sistema di mundo domina nan bida, pero esnan cu ta fiel y berdadero, lo wordo persigi, sera, y hasta mata.
Juan Bautista a wordo silencia, pasobra e bisa Herodes su berdad, tocante e inmoralidad den su bida, pero Cristo Hesus a bini y a sigi proclama e berdad, pa mundo por sa e berdad, pasobra e berdad ta haci hende liber.
Esteban a wordo piedra dilanti di Saulo di Tarso pa motibo di e berdad, pasobra e hendenan no por a soporta e berdad, pasobra ora hende ta biba den pica y inmoralidad, berdad ta zona como ofensa.( Hechonan 7:54-60).
Apostol Pablo a bisa: Pasobra mi no tin berguensa di e Evangelio, pasobra esaki ta e poder di Dios pa salbacion, pa tur cu ta kere, pa e hudiu prome, y tambe pa e griego. Pasobra den esaki e husticia di Dios ta keda revela di Fe pa Fe, manera ta para scirbi: Ma e hende husto lo biba pa fe.( Romanonan 1:16-17.).
Pasobra e mensahe di e crus ta locura pa esnan cu ta perese, ma pa nos cu ta wordo salba e ta e poder di Dios. ( 1 Corintionan 1:18).
Y no tin salbacion den ningun otro, pasobra no tin bao di cielo, ningun otro nomber, cu a wordo duna na hende , pa medio di cual nos mester wordo salba.( Hechonan 4:12).
Cristo Hesus a bisa , Ami ta e caminda , y e berdad , y e bida, ni un hende no ta bin serca e Tata, si no pa medio di Mi.( Juan 14:6).
Ma Pedro y Juan a contesta y a bisa nan: Boso huzga si ta corecto den bista di Dios,pa scucha na boso mas cu na Dios, Pasobra nos no por laga di papia loke nos a mira y tende. ( Hechonan 4:19-20).
Hesus a bisa palabranan fuerte; Tur nacion lo odia boso pa causa di Mi nomber.
Si nos wak e rebeldia cu tin rond mundo contra e palabra di Dios, nos ta compronde den ki tempo nos ta bibando.
Den Romanonan 13:11 ta para scirbi: Y haci esaki conociendo e tempo,cu ya ta ora pa boso lanta for di sonjo, pasobra awor salbacion ta mas serca nos cu nunca, cu tempo nos a kere.
Den tur forma tanto pa medio di pelicula, como pa medio di literatura, e scuridad ta purba pa alcansa nos hobennan, pasobra e tempo ta serca, y cada dia nos ta mira con Juan 10:10 ta manifesta riba e mundo aki.
Nada por silencia e Palabra di Dios.
Sinceramente, Pastor Marcel Balootje
