Dialuna ultimo, un serie di declaracionnan contradictorio a wordo duna dor di figuranan importante tanto den Parlamento y pafor. A lanta duda serio tocante e integridad y credibilidad di e actornan envolvi den e proceso di nominacion di presidente di parlamento. Apesar cu partido MEP a manda su carta cu nomber di nan escogencia y nominacion cual ta Sr.Edgard Vrolijk pa 8’or di mainta, parlamentario Raymond Kamperveen, y minister Ursell Arends a declara despues, respectivamente 11’or di mainta y 2’or di merdia, cu nan no a haña ningun contesta di MEP. E acto serio aki ta pone den duda e transparencia di e proceso cerca Raiz y e credibilidad di Kamperveen, Ursell y Raiz den nan declaracionnan. Perde credibilidad den institucionnan clave manera esaki no ta un asunto chikito, y e situacion ta lanta preguntanan urgente tocante e responsabilidad y compromiso cu integridad di e lidernan cu ta na e cabes di decisionnan crucial pa nos pais. Di un banda nan ta cuestiona “imparcialidad” den parlamento, pero cu e declaracionnan aki, nan integridad awor ta na duda. Dicon a gaña? Pasobra e complot di Misha y Guiano tabata cla caba? Ta hopi obvio cu nan a celebra nan hazaña, di haci Parlamento nan Magashina, pero mancha pa e voto di corupcion di Benny Sevinger.
