Diaranson anochi na cede di partido Movimiento Electoral di Pueblo (MEP), lider di partido Evelyn Wever-Croes cu hopi honor a anuncia cu señora Natalie Geerman ta e di dos candidato nobo, cu lo uni su mes na e famia di MEP pa e siguiente eleccion dia 6 di december proximo.
Natalie ta yiu muhe di Juni Geerman y Cynthia Croes, y nieta di Jose Geerman cu no ta un persona desconoci den mundo di poltica, ya cu e sirbi como deputado di Aruba, miembro di Staten di Antiyas y miembro di Eilandsraad di Aruba. Tambe su tata tabata un gran campañado di partido MEP.
Na un edad jong, Natalie su famia a bay Hulanda na unda e la biba te cu su 12 aña, prome cu nan a bolbe bek Aruba. Su trayecto di estudio ta un poco inusual, mirando cu el a cuminsa na ETAO, sigui pa Mavo, Havo y despues a studia y a logra un “Bachelor” den docente di economia pa despues termina su “Masters” den educacion.
Natalie ta lanta na Pos Chikito, y a conoce su casa di Savaneta na un edad jong. Nan tin 2 yiu, y aunke no tabata un trayecto facil, a engrandece su fe pa kere den lo imposibel. El a cuminsa traha na un edad hoben como lider di club di mucha y hobennan, y yuda organisa varios campamento pa mucha y hoben. Tambe mirando e amor grandi cu e tin pa mucha, el a dedica tempo como boluntario pa yuda na Casa Cuna, na sociaalfonds di Colegio Arubano y diferente otro instancianan na beneficio di mucha y hoben. Na 2018, el a publica un buki na Ingles yama ‘Serenemo’ cu ta un storia scirbi pa hobennan confrontando perdida di un ser keri.
Actualmente, Natalie ta director na un scol di segundo oportunidad na unda e tin casi 7 aña trahando pa brinda oportunidad na alumnonan cu mester un “second chance” of kier sigui studia. El a splica cu na final di aña e ta disfruta di wak su alumnonan ricibi nan diploma. Cada un cu nan storia y cada un cu nan retonan.
Durante su prome discurso como candidato nobo di MEP, Natalie a gradici lider di partido pa dun’e e oportunidad di representa nos comunidad. Educacion ta su pasion, y e oportunidad di por haci un diferencia riba bida di e studiantenan ta dun’e hopi satisfaccion. Cu e mesun determinacion cu e tin pa sigui educa nos muchanan y hobennan, e ta compromete su mes di sirbi pais Aruba, papiando semper e berdad y dunando semper lo miho di dje. Tambe Natalie ta compromete su mes pa bringa pa e veld di enseñansa, no solamente pa e muchanan sino tambe pa e docentenan pa nan sinti balora y cu nan tin e oportunidad di sigui desaroya.
“Mi ta uni mi mes na partido MEP, cu ta un partido na unda mi sa cu mi lo por haci un diferencia pa mi pais. Partido MEP a demostra di ta para pa principio, norma y balor, guia pa un lider cu a demostra di ta un persona cu ta traha cu amor sincero pa Aruba, y ta duna hopi di su mes pa nos pais. Partido MEP a logra trece trankilidad den e mundo di enseñansa y a cuminsa cu varios cambio. Awor a yega ora pa sigui cu e cambionan na un manera responsabel. Danki na ful mi famia pa nan sosten, y na e gran famia di MEP pa e oportunidad di por traha dignamente pa mi pais, Nos tin un isla bendiciona, e preti wowo di Dios” Natalie a expresa.
