Den un charla organisa na Cede di MEP diahuebs ultimo, riba e topico Status Aparte, lider honorario di MEP Nel Oduber a recorda tur esnan cu ta sconde tras di e pretexto “ta bo lider a firma”, cu si Evelyn Wever-Croes no a firma cu Hulanda, Aruba lo no a haya entrada durante pandemia, y ningun hende lo a sobrebibi.
Ex Prome Minister Evelyn Wever-Croes a firma pa presta casi 916 miyon florin pa e pueblo por a come y pa subsidia salarionan di trahadonan di gobierno, trahadonan di comercio y trahadonan di hotelnan y restaurantnan.
Si e minister president di e tempo ey, Evelyn Wever-Croes, no a bai fia placa di Hulanda, ningun hende por a come y comercio lo no a haya placa pa por paga salario na 38 mil trahado. Tampoco lo por a paga e subsidio Fase na trahadonan cu a perde trabou na restaurantnan y companianan grandi, mediano y chikito. Te awe tin companianan cu debe gobierno y no a paga bek e subsidio di salario cu a haya dimas.
“P’esey cada biaha cu un hende bisabo cu ta bo lider a firma, bisa nan cu el’a firma pa abo y bo famia por come” Nel Oduber a bisa.
