Diaranson a tuma lugar e caso den corte unda Sra. Ofelia Beyde a demanda Nelson Andrade pa rectifica su acusacionnan falso, treci dilanti den un noticiero dia 19 di April 2021.
Nelson Andrade no a presenta ningun prueba:
Nelson Andrade no a trece ningun prueba pa substancia su acusacion contra Sra. Beyde. E kier a defende su mes indicando cu e ponencia contra Sra. Ofelia Beyde, no ta un ponencia di dje, sino un ponencia di Leoncita Arends, cu ta tilda Sra. Beyde di a print out su e-mailsnan na aña 2016. El’a presenta cu un carta chikito skirbi na man, aparentemente di Leoncita Arends, kende na “pensamento” di Leoncita, Sra. Beyde por ta esun cu a print out su e-mails. Mas cu logico, cu esaki no ta un prueba, pasobra “pensamento” of “opinion” di Leoncita, no ta un PRUEBA!!
Sinembargo durante e noticiero di dia 19 di April 2021, na ningun momento Nelson Andrade a bisa cu su acusacion ta “segun Leoncita”. El’a trece e acusacion dilanti, den su voz, for di su persona, y sin ningun parti indica cu e ta referi na pensamento di Leoncita Arends of cu ta un opinion di Leoncita. Tur hende cu a scuch’e, a kere cu loke el’a bisa ta berdad.
Es mas, el’a usa un forma “stellig”, pa acusa Ofelia, indicando cu TE t’esun cu a print out e-mails di Leoncita, cual acto Sra. Ofelia Beyde ta nenga categoricamente!
Alcontrario, e otro persona cu tabatin password di Leoncita, cual segun su propio noticia, ta e propio esposa di Nelson Andrade. Señora Andrade ta esun cu tabatatin acceso na e-mail di Leoncita, pasobra segun Nelson, ta su esposa a cambia e password pa Leoncita.
Conclucion ta cu e defensa di Nelson Andrade ta uno hopi swak, dor di kier insinua, cu loke la trece dilanti, ta loke Leoncita ta opina of pensa. Esey no ta haci’e un berdad y tampoco el’a menciona esey durante di su noticiero, esta “segun pensamento di Leoncita”.
Esaki ta haci cu e noticia a wordo treci dilanti cu “ta asina e ta”, mustrando un berdad, esta cu ta Sra. Beyde a print out e e-mailsnan, cual ta un acusacion serio y cu Nelson Andrade no a trece prueba di su alegacion fuerte contra Beyde.
Sra. Beyde ta nenga categoricamente di tin algo di haber cu “Leoncita Leaks”, bisando cu e nunca haci dicho acto cu e ta wordo culpa di dje.
Kico e caso aki tin di haber cu caso Avestruz?
Dia 19 di April 2021 via su programa di radio, Nelson Andrade kier a informa pueblo con e caso Avestruz a cuminza. Aki e tin rason, pasobra e caso a cuminza ora cu e-mails di Leoncita a lek. Ey ta unda e tapadera di e beerput di corupcion a habri. Ta den e cientos di e-mail di Leoncita Arends a bin descubri loke ta sosodiendo tras di cortina cu negoshi tereno, unda henter e famia Arends, a bira probechista pa asina fix nan mes un cantidad di tereno di pueblo, cu e unico meta pa bende esaki na Venezolanonan miyonario.
Na hopi ocacion Nelson Andrade ta tira culpa riba Rocco Tjon, cu a hiba un recapitulacion pa Ministerio Publico di loke ya tabata publicamente conoci desde 2016. Pues, e caso Avestruz a cuminza ora cu e-mail di Leoncita a lek. Den e rabia aki, Nelson Andrade a bay culpa Sra. Ofelia Beyde, pero e Sra. aki no a accepta e acusacion y ta pidi rectificacion.
Cu e noticia treci dilanti ta un opinion di Leoncita, e ora ey Nelson Andrade a faya di menciona esey den su programa di radio. Awor ta hopi laat. Dia 23 di Juni 2021 corte lo dicta un sentencia y maske ningun hende por sa ta kico huez lo dicta, ta keda un hecho cu Nelson Andrade kier a twist e caso dilanti huez, pero lubidando cu su tape ta bisa otro cos.
