Marko a para firme cu e radio di polis horta, el’a haye for di man di Andrade
Oranjestad, Aruba: Desde 9’or y mey di mainta, Hof a cuminsa trata e caso Kinikini den, esaki despues cu e sospechosonan a apela. Ta trata di e caso den cual e miembronan di prensa Nelson de Andrade y Marko Espinoza y e agente policial Rasmijn a wordo sentencia den corte di Prome Instancia, nan no tabata di acuerdo cu e sentencia y a dicidi mesora pa apela esaki.
Dialuna pa un of otro motibo ambos reportero a dicidi di hala atras di nan apelacion y acepta nan sentencia cu Corte di Prome Instancia a dicta.
Dialuna den oranan di merdia, e caso aki a coy un otro buelta, ambos reportero a wordo pidi pa ta testigo den e caso di awe diamars mainta contra e agente policial din fam Rasmijn, kende a wordo condena pa malversa radio di polis, Rasmijn ta e agente policial cu hunto cu e reporteronan a apela su caso.
Hues den Corte di Prome instancia a mustra cu a usa e radio aki den media pa scucha Polis. Hues ta haya cu Rasmijn a mal usa su posicion di Polis. Segun Hues, cu mester por confia cu informacion cu Polis haya ta secreto y no ta yega den media. Hues ta haya cu Rasmijn a duna mal imagen na Polis y den comunidad. Ministerio Publico a bisa cu lo tin intencion di kita Rasmijn for di trabou. Teniendo na cuenta cu ta trata di un first offender, Rasmijn a wordo condena na locual Fiscal a exigi, cu 240 ora di trabou comunitario of 120 dia di prison. E tempo cu e tabata encarcela lo wordo desconta for di e oranan di trabou comunitario.
E periodista Sr. Nelson de Andrade, a presenta den Corte acompaña pa su abogado mr. Chris Lejuez. Hof a bis’e pa e pensa bon kiko e ta papia y no bisa cos djis pa bisa. Hof kier haya claridad den e caso aki. Sr. Andrade a bisa cu recientemente e la hala su apelacion aden, pasobra e no tin tempo pa esey. Hof a bisa cu esey ta significa cu e ta bay di acuerdo cu e sentencia. Speed a bisa cu e no kier bringa cu Husticia. Hof a puntr’e pakiko cada ves durante investigacion, e la haci uso di su derecho di silencio, Speed na su turno a bisa cu e no kier tin problema cu Ministerio Publico.
Speed a bisa cu e ta amigo cu Rasmijn, pero pa hopi tempo e no ta papiando cun’e, tambe cu e no sa Si Rasmijn ta su amigo ainda. Door di e caso aki e nan no ta papia cu otro.
Hof a hala Speed su atencion pa e scucha bon y duna contesta alcaso. Hof a puntr’e si e la papia cu Marko. Speed a contesta cu ayera e la papia cu Marko y a bis’e pa e papia segun su consenshi. Hof a mustra cu Marko a papia riba Speed. Aki Speed a bira un poco emocional (nervioso) y hof a hala su atencion pa e scucha bon. Hof a mustra cu Marko a bisa cu na 2015 pa 2016 a haya radio for di speed pa scucha Polis y na 2018 a bisa Marko pa hiba e radio pa e agente Rasmijn. Hues a puntr’e y Speed a bisa cu e no ta corda esaki. E la desmenti di a duna Marko radio y dun’e ordo pa hiba e radio pa Rasmijn.
Hof na su turno a remarca “cu e ora Marko ta ganja?”
Hof a bisa e reportero Marko Espinoza pa e papia e berdad, pa asina duna claridad den e caso aki. Si e no papia e berdad, e lo haye den problema. No papia cos cu e no sa sigur. Marko a bisa como un periodista e conoce Rasmijn, relaciona cu Harley Davidson, e la yega di haci un entrevista cun’e. Hof a mustra cu e hecho cu Marko a hala e apelacion aden kiermen cu e ta di acuerdo cu e castigo cu e la ricibi den Corte di Prome Instancia. MArko na su turno a cuminsa bisa, cu henter e caso aki ta un asunto politico y no ta di acuerdo cu e la wordo castiga. Hof a mustra cu for di investigacion haci ta mustra cu tur cos ta drei rond di dje. E la bisa cu na principio e no kier a bisa nada, pero despues cu e la papia cu su abogado mr. Chris Lejuez e la dicidi di papia e berdad. Hof a mustra cu Marko a declara na polis cu e la haya e radio y e cargador for di Speed na 2015 pa 2018 pa asina nan por scucha polis. Na januari 2018, Speed a bis’e pa hiba e radio y cargador pa Rasmijn. Speed a dune number di Rasmijn. Entre 2016 pa 2018 e la yama Rasmijn y a bisa cu despues di su detencion cu e la hiba e radio na un tal Theo y esakin a wordo hiba na un otro adres. Marko a admiti den corte cu asina e la bisa.
Abogado mr. Illes cual ta abogado di Sr. Rasmijn a bisa Hof cu e no ta haya necesario pa scucha e otro testigo cu ta di fam Dirksz. Hof a pospone e caso pa un rato pa bay mira si e testigonan lo por bay of no, despues di un rato Hof a dicidi cu tur e testigonan por bay numa. Rasmijn despues di a scucha e testigonan a bisa Hof cu aparentemente Speed tabata tin diferente radio y e ta lamenta cu Speed no a bisa con e la yega na e radionan aki. Pa loke ta Marko, Rasmijn ta lamenta cu Marko no a papia e berdad. Rasmijn a bisa cu nunca e la duna ni accepta niun radio for di Marko
