Durante fin di siman, situacion den baseball di grandes ligas a bira bastante cayente ora cu e dos eterno rivalnan di tur tempo a midi forza pa ultimo biaha den campeonato regular di baseball di grandes ligas 2021.
Ta trata aki di New York Yankees cu a bishita Fenway Park di Boston Red Sox, prome cu e serie aki a inicia, Boston Red Sox tabata domina e puesto number 1 di wild card mientras cu New York Yankees tabata 2 wega atras.
Diabierna anochi Boston Red Sox a presenta cu su pitcher Nathan Eovaldi mientras cu New York Yankees a presenta cu Gerrit Cole.
For di trempan por a tuma nota cu Eovaldi no tabata tin su mihor anochi, su picheonan tabata keda hopi mei mei di plato caminda cu bateadornan di Yankees no ta pordona e picheonan aki, prome wega a wordo gana pa New York Yankees cu score di 8-3.
Diasabra atardi e di dos wega a tuma lugar unda cu Boston Red Sox a presenta cu Nick Pivetta mientras cu New York Yankees a cuminsa cu Nestor Cortez Jr.
Aki si tabata un wega full diferente caminda cu ambos pitcher a domina te laat di wega, Boston Red Sox tabata ariba cu score di 2-1 te den cabez di ocho inning unda cu heroe di anochi a resulta di ta Giancarlo Stanton cu a conecta un grand slam pa asina gana e di dos wega cu score di 5-3.
Diadomingo tabata e ultimo wega entre e dos ekiponan aki pa loque ta trata campeonato regular caminda ganador di e wega aki lo pasa pa prome lugar di wild card, New York Yankees a presenta cu Jordan Montgomery como nan pitcher habridor mientras cu Boston Red Sox tabata tin Eduardo Rodriguez como nan pitcher habridor.
Un wega interesante caminda ambos pitcher habridor tabata dominante, Boston Red Sox den e wega aki ta pica dilanti 1-0 den bom di cuater inning, pero New York Yankees ta reacciona y ta tuma ventaha bek den cabez di cinco inning cu score di 2-1.
Den bom di 7 inning, 2 error a costa e ventaha di Yankees caminda Red Sox ta tuma ventaha den e wega aki cu score di 3-2, pero un biaha mas e lineup di poder di New York Yankees a sa di responde den oranan crucial caminda e heroe pa di tres dia sigui a resulta Giancarlo Stanton cu a conecta un homerun largo atrobe pa asina duna New York Yankees e victoria y asina tambe bari Boston Red Sox den e serie final entre ambos ekipo.
Cu e victoria aki New York Yankees ta pasa pa prome lugar di Wild Card, lagando asina Boston Red Sox na di dos lugar di Wild Card.
Falta solamente 6 wega, y te ainda tin mas ekipo den lucha pa un puesto di playoff den Liga Americana, keda pendiente pa mas informacion di baseball di grandes ligas den Solo di Pueblo, Brillando Fuerte.
