Despues di lesa e noticia cu Hulanda y Spaña a firma acuerdo riba transicion energetico pa Hidrogeno, esaki a confirma na Minister Glenbert Croes, cu e caminda di liderazgo cu Aruba a encamina pa haci e transicion energetico pa energia limpi, ta e caminda corecto.
Aruba ya a busca acercamiento na Hulanda. Tur hende por corda e bishita di trabou cu e mandatario a sostene na e Hydrogen Valley ubica na Groningen, Hulanda. Riba recomendacion di Groningen, e contacto cu Acciona Energia a wordo estableci. E bishita oficial di trabou na Spaña tambe a tuma lugar te cu mientras tanto e compania Acciona Energia a bin Aruba. Y manera e mandatario a anuncia den luna di MEI ultimo, Utilities y Acciona Energia a yega na un entendimento pa por sigui negocia e realisacion di Aruba Hydrogen Valley.
E acuerdo entre Spaña y Hulanda, apadrina pa Su Mahestad Rey Willem Alexander y Rey Felipe, ta yena e mandatario cu hopi orguyo pasobra cu e ta un confirmacion cu e caminda aki cu Aruba a encamina, ta e caminda di futuro, ta e caminda corecto pa Aruba. Y cu e compania cu cual Aruba ta negociando, esta Acciona Energia di Spaña tambe ta esun corecto.
Mientras tanto opositornan Anti Aruba, ta purbando di kibra e iniciativa aki di Gabinete Wever Croes II, cu diferente relatonan den prensa contra e desaroyo aki, hasta un voicenote di un supuesto experto Spaño, purbando di bagatalisa e transicion energetico aki. Pa e mandatario tur e criticanan aki ta prueba cu ta canando e caminda corecto, cu e vision energetico ta esun corecto, cu Aruba Hydrogen Valley mester bira realidad.
E proyecto Aruba Hydrogen Valley ta pa Aruba, y no ta importa ta ken a logr’e pasobra e proyecto aki ta un logro pa Aruba, pa futuro di Aruba, un logro pa nos futuro generacionnan, lagando di awe caba un planeta limpi atras pa nan. E ta un fundeshi cu nos mester construi awo pa laga atras pa nos yiunan. Y ta awo nos mester hacie. Awo ta e momento. E futuro ta cuminsa awo.
E mandatario su soño ta cu Su Mahestad Rey Willem Alexander hunto cu Su Mahestad Rey Felipe di Spaña, hunto pone e prome piedra di Aruba su Hydrogen Valley. Cu e compromiso aki Minister Glenbert Croes ta traha pa sigui hiba Aruba dilanti.
