Den Genesis 13:12-13, nos tur por lesa con Lot sabiendo cu e hendenan di Sodoma ta mal hende toch e bay pone su tentnan te na Sodoma: E palabra di Dios ta bisa lo siguiente; Abraham a keda biba na tera di Kanaan , mientras cu Lot a keda biba den e stat di e vaye , y a bay pone su tentnan te na Sodoma.Awor e hombernan di Sodoma tabata masha malbado y pecador contra Senjor.
( Tene cuenta cu ora Bijbel ta bisa di hombernan e kiermen e hendenan cu ta biba den e stat, pasobra antes ta solamente hende homber tabata wordo conta).
Y nos tur sa e consecuencia pa Lot cu a bay biba na rand di Sodoma y Gomora y pa e motibo e a perde tur cos, ta Dios a spaar su bida, y su dos yiu muhernan , ya cu su casa a wak atras y bira un pilar di salo, pero locual ta material a bay perdi den candela cu Senjor a manda for di cielo.
Den Juesnan 16:1 Samson tambe ta bay Gaza y ta drumi cu un prostituta, pero e tabata bon na altura cu e no mester haci esey, pesey despues e ta sigi y ta stima un muhe di e vaye di Sorek cu yama Dalila, y tur hende sa e consecuencia di su desobediencia, con su cabeynan a wordo corta y su wowonan a wordo saca, e a keda preso di e Filisteonan y a muri un morto prematuro.( 16: 20,21-30).
Mescos cu David tambe cu a bay drumi cu Betsabe, sabiendo cu e ta casa di Urias y despues kier a tapa cos, y a manda mata Urias pa su maldad keda scondi, pero Dios no a permiti esey, pasobra Dios no ta compinche di maldad di ningun hende, Dios ta saca tur cos na cla, pesey Dios a manda Profeta Natan pa reprende David cu tur e consecuencia conoci.
Pesey den Salmo 51:11-12 David su oracion y suplica tabata: No tirami for di Bo presencia.no kita Bo Spirito Santo for di mi, duna atrobe e goso di Bo salbacion.
Aki nos por mira cu sea bo ta rico of pober, grandi of chiki, rey of esclavo, pica no ta cos di chansa cune, pasobra riba un dia tur cos lo sali na cla y tur consecuencia lo bini hunto cune.
Wak cuanto hende ta corre auto burachi, pasobra buracheria ta pica, nan ta causa accidente, nan ta purba sconde, pero na final nan ta wordo gara, si nan mes no entrega despues di accidente, pero tur ta na altura cu no mester corre auto burachi.
Wak cuanto abusador di mucha, ta haci nan maldad pa anjos,usando menasa pa e mucha no papia, pero Dios si ta papia, y nan maldad ta wordo descubri no ta importa ken nan ta y con sabi nan ta , ni tampoco e posicion den comunidad, pasobra pica no ta cos di chansa cu ne.
Esun cu sconde su picanan lo no prospera, ma esun cu confesa y laga nan lo hanja misericordia.( Proverbionan 28:13).
Ora rey Saul a desobedece Dios ta para scirbi: Awor e Spirito di Dios a bay for di Saul, y un spirito malo for di Senjor tabata terorisa Saul. Un ehempel mas pa hende no chansa cu pica.
Laga nos no lubida, cu despues cu Judas a traiciona Hesus su consenshi a morde y kier a hiba e placa bek pero e hendenan no kier a tuma e placa, bisando . Kico nos tin cunes? Esey ta bo asunto? Y nos tur sa e consecuencia.(Mateo 27:3-10).
Sinceramente Pastor Marcel Balootje
