Segun Financial Times, presidente Venezolano Nicolas Maduro a tuma medidanan di siguridad mucho mas estricto ora cu e peliger di un posibel atake militar di Merca a bira mas grandi. E aparicion publico di Maduro a bira mas controla y sin anuncio previo, cu solamente un grupo selecta di simpatisante y funcionario presente.
Analistanan militar ta bisa cu e cambio den manera di presentacion publico ta mustra cu Maduro ta sigui “protocol clasico” ora cu un lider ta sinti menasa. Mientras Merca a desplega varios barco di guera hasta un portaavion moderno den Caribe, e gobierno di Caracas ta wak esaki como un paso mas cerca na un posibel intensificacion di confrontacion.
Fuente di inteligencia ta indica cu den aparato di siguridad di Maduro tin un ambiente di desconfiansa total y cu personal Cubano tin un rol mas grandi pa motibo di temor pa traicion interno. Na mes momento, hopi lider prominente di su propio gobierno ta haci aparicion separa pa evita cu figuranan importante ta haya golpi hunto.
Maduro a bisa cu ta dispuesto pa dialoga cu Merca, pero no ta permití “ningun masacre” contra su pueblo. Ainda asina, tin fuente cu ta indica cu e tension ta na un punto critico, entre un posibel acuerdo diplomatico of un ola di violencia cu por tin consecuencianan serio p’e region.
