Biblioteca Nacional Aruba a ricibi e buki di Olga van der Klooster, titula ‘Niets zal ik onbeproefd laten, De Caribische erfgoedcollecties van Anton van Koolwijk: dienaar van God, de wetenschap en de Nederlandse Staat’ pa su Coleccion Nacional. Olga van der Klooster a entrega su ultimo publicacion na directora sr. Astrid Britten y sra Zetsia Ponson, encarga cu Dept. Arubiana.
Resumen di e buki
E asina yama ‘Coleccion Van Koolwijk’ ta pertenece na e coleccionnan mas varia di e herencia cultural di Aruba, Boneiro y Corsou. For di Hulanda a surgi den siglo 19 un interes cientifico creciente den e cultura indigena di e Islanan Abou. Anton van Koolwijk, kende a traha como pastoor entre 1871-1886 riba e tres islanan, a mira un tarea importante pa su mes. Pa e museonan nacional Hulandes, hardinnan di cultivo y e Exposicion Internacional Colonial y di Exportacion na Amsterdam (1883), el a traha tur sorto di coleccion, manera cocolishi, mata, tipo di palo, spons di lama, y cosnan arkeologico y etnografico. Tur cos a wordo bon inpaketa y manda pa e instancianan concerni na Hulanda pa investigacion cientifico.
Contrario na Boneiro y Corsou, caminda e no a topa mas hende reconocibel como grupo indigena, na Aruba si el a haya un comunidad tradicional, maske esaki tabata na punto di disparce. Hende grandi a cont’e cu nan a presencia entieronan indjan. Nan a conoce Tio Kaussie ainda, e ultimo piscado indjan di Tanki Flip y tambe Nicolaas Pijclaes, e supuesto ultimo indjan di Savaneta. Van Koolwijk a pura pa anota nan storianan, studia nan idioma bieu y documenta nan conocemento di matanan medicinal. Tambe el a colecciona nan obhetonan di uzo diario, manera paña, sapato, macutu, sombre, instrumentonan musical, cos di cushina y hasta un pochi cu sumpiña di cadushi pa pega paña. Y tambe contrario na Boneiro y Corsou, caminda el a haya solamente pida pida skerf, e suela Arubiano a dun’e urnanan funerario indjan bieu, garishinan di awa y weanan.
Loke popularmente a cuminsa wordo yama e ‘Coleccion Van Koolwijk’, ta en realidad un coleccion cu a wordo treci hunto door di un red di hende. Asina Van Koolwijk a haya ayudo na Aruba di guianan, pastoor Hendrik de Vries, e meesternan di districto Hein Maduro y Johannes Kort, e doño di Hofje Fontein, sastre Frederik Olivet, meneer di school Hermanus Kuiperi y di diesnan di trahado di veld cu a keda anonimo. E coleccionnan ta wordo maneha ainda pa un cantidad di museo Hulandes. E obhetonan arkeologico y etnografico ta te haya den e depositonan y e exposicionnan fiho di e Wereldmuseum na Amsterdam y na Leiden. Un cantidad chikito ta desde 2009 na fia cerca e Museo Arqueologico Nacional Aruba (NAMA). E obhetonan ta unico y ta representa un balor museal halto. Pa e islanan ABC e herencia cultural aki ta conecta tambe cu nan historia y identidad material y inmaterial.
Olga van der Klooster a haci diesdos aña di investigacion. E ta historiador di arkitectura y cultura y co-autor di e publicacionnan anterior ‘Bouwen op de Wind, Architectuur en Cultuur van Aruba’ y ‘Monumentengids Aruba’.
