Nine Lives Aruba Foundation ta lamenta masha hopi di mester anuncia cu pa via di falta di fondo a causa di cancelacion di evento di fundraising y un reduccion den donacion local (locual ta usual tur fin di anja) NO ta posibel pa nos tuma NINGUN pushi mas pa anja 2021 y prome lunanan di anja 2022 ‼️ 

Nos ta pidi atencion special pa e sigiente puntonan:

1.  Nos a tuma nota cu mas y mas pushi y cacho ta wordo abandona. Nos ta sospecha cu den hopi caso e causa ta cu e doño di e mascota no tin e recurso financiero mas pa cuida na un manera responsabel pa su mascota, especialmente pa sterilisa nan, awor cu e campaña di Stimami Sterilisami a wordo suspendi.

2. Tur fundacion di rescate na Aruba tin e bon voluntad pa yuda tur mascota den necesidad pero tur fundacion tin un limite di capacidad. E limite ta determina pa e fondo financiero disponibel y e number di voluntario disponibel.

3. Fondonan financiero ta sumamente limita! Nos tin cu hasi fundraising pa TUR COS cu nos ta hasi. Esaki ta e razon dicon nos ta pidi constantemente pa sponsor y donacion.

4. Nos tin un tremendo grupo di voluntario pero den esey tambe nos tin limite. Nos no tin cientos di voluntario! Si bo persona por volunteer como foster y eventualmente siendo foster, por sponsor cuminda of procedura veterinario chiquito, por favor tuma contacto cu nos!

5. Na lugar di sinta na banda y keha y critica, YUDA! Ofrese bo servicio pa bira foster o voluntario.

6. Por yuda nos yuda nan door di sponsor un operacion di sterilisacion pa un pushi den bo bario. Opera un pushi hembra ta costa entre Afl 170/$95 – Afl 125/$70 y un pushi homber entre Afl 65/$36 – Afl 50/$28. Si nos ta hanja sponsor, nos por pone e pushi riba lista pa wordo gara y sterilisa. Nos por yuda gara pushi (trap) y hiba nan veterinario pero pa por hasi esey mester sponsorship pa cada uno! Tambe ta bon pa nota cu nos tin UN persona SO cu ta yuda nos gara e pushinan (trapper) y e tin su trabow fulltime, asina ta nos manpower ta sumamente limita. Y finalmente ta bon pa nota cu pushinan cu nos a gara y opera ta wordo poni bek na e lugar cu a gara nan!

7. No ta logra NADA cu rabia of papia fresco cu nos o nos voluntarionan! Insulta nos voluntarionan ta sumamente desagradabel y lo no wordo acepta! Tur voluntario di tur fundacion ta hasi lo maximo posibel cu tempo y recurso limita. Por fabor sea cortes y traha cu nos pa hanja un solucion, pero no spera cu nos ta e unico solucion! Si nos no por tuma bo pushi, nos ta dispuesto pa hasi lo maximo posibel usando nos social media pa yuda pa e wordo adopta pero nos no por hasi milager! Y mas cu tur cos: no menasa nos cu bo ta hiba bo pushi Centro pa Control di Cacho! Si bo ta scohe pa hasi esey, e ta ariba BO cabes, NO di ningun fundacion!

DANKI PA BO PASENSHI Y YUDA NOS YUDA NAN ‼️

LEAVE A REPLY

Please enter your comment!
Please enter your name here