Si nos tene cuenta cuanto caso tin cu ta parce cu no tin solucion.
Cu no por hanja esun cu a comete e acto,
of tin caso ta tarda pa motibo di hopi investigacion,
of tin inhusticia comete contra un persona,
of tambe por sosode caminda e malbado ta wordo sosteni of scondi,
of tin hende a tuma placa bao di man pa nan no papia,
of tin hende menasa cu morto, pa nan no bisa nada,
of tin hende curason duro, cu no kier entrega ,
ni tampoco confesa, hasta nos por yega asina leu cu tin hende a sinta castigo pa otro hende,
of tin hende a comete un acto criminal y a huy bay afo y ningun hende sa unda nan ta.
Tin hende perdi cu otronan ta kere cu nan ta morto, pero nan no ta morto.
Den tur caso Dios si sa tur cos, y Dios na Su tempo lo saca tur cos na claridad.
Den tur cos nos mester reconoce e soberania di Dios, y haci tur manera pa no biba dos bida den presencia di Dios, pasobra hende por ganja hende pero ningun hende por ganja Dios.
Y mas tanto nos tarda pa papia e berdad, of mihor bisa arepenti, confesa y aparta, mas den scuridad nos hinca nos bida.
Dios ta duna tur hende oportunidad pa confesa pasobra su palabra ta bisa: Si nos confesa nos pica E ta fiel y husto di pordona nos , nos picanan , y libra nos di tur inhusticia.
Esaki ta nifica cu tur hende tin chens di arepenti y bini na Cristo Hesus, ningun hende no a wordo exclui di e amor di Dios. Pero si un hende keda persisti den su maldad, orguyo y inmoralidad e mes lo carga e consecuencia di su capricho y curason cu no kier arepenti.( Romanonan 2:5).
Hende tin cu tene cuenta cu ora un persona no kier reconoce Dios den su bida, e ta haci tur esnan cu ta stime tristo, pero di otro banda e persona ey segun Romanonan 1:28-32 , Dios mes lo bira contra di dje.
No ta pornada ta para scirbi den Juan 3:36: Esun cu ta kere den e Yiu tin bida eterno, ma esun cu no obedece e Yiu, lo no mira bida, ma e furia di Dios lo keda riba dje.
Papia malo di hende, calumnia, redo, envidia, tur ta parce manera nan ta scondi, pero den bista di Dios tur ta den claridad, y Dios mes lo saca tur cos na cla.
Manipulacion di amistad, usa otro hende como garoti pa tene lanta, tur esey hende ta pensa cu ningun hende no sa, pero Dios si sa.
Laga nos no lubida cu David como rey a sconde su pica te ora Dios a manda profeta Natan pa saca rur cos na cla.
No tin ningun criatura scondi pa Su bista, ma tur cos ta habri y bisto dilanti di wowo di Esun cu nos tin di haber cunโE. ( Hebreonan 4:13).
Pasobra no tin nada scondi cu lo no wordo revela,ni nada secreto, cu lo no bira conoci y sali na cla.( Lucas 8:17).
Pesey no sigi husga prome cu tempo,ma warda te ora Senjor bini, Kende tambe lo trece na cla e cosnan scondi den scuridad,y descubri e intencionan di curason di hende,y e ora ey cada hende lo ricibi su elogio for di Dios.
Pasobra esun cu haci malo, lo ricibi e consecuencia di e maldad cu e a haci,y esey sin distincion di persona. ( Colosensenan 4:25).
Pa Dios nada ta scondi. Sinceramente, Pastor Marcel Balootje
