Ningun hende por sirbi dos Dios, no ta cumbini hende pa nan ta cu Dios y alabes mescla cu e sistema di mundo, sea pa placa, posicion of poder, pasobra na final lo tin decepcion.
Pasobra Dios ta exigi santidad, integridad, y un principio moral halto caminda nos ta rechasa pica, y somete nos mes na Dios completamente.
No ta posibel pa sirbi Dios, y mitar di e sistema di mundo, pasobra Dios,ta exigi pa nos papia berdad y es mas,biba cu e berdad, pero e mundo ta pusha hende pa papia mentira of sea complice di mentira.
Dios a manda su unico Yiu pa ken cu kere den dj;E wordo salba completamente,pa su gracia y su gran amor, pasobra nos ta propiedad di Dios.
Asina nos drenta yugo desigual, den caulkier cos cu nos ta haci, nos mes ta trece confusion den nos bida , pasobra ta bay yega e momento cu ta dificil pa scohe, pasobra e sistema di mundo lo kier usa nos , y eynan nos tin cu corda cu nos ta sirbido di Dios.
Pesey e palabra di Dios ta bisa: Boso no sa cu amistad cu mundo, ta enemistad cu Dios, esun cu kier ta amigo di e mundo ta haci su mes enemigo di Dios.
Nos curpa ta tempel di Dios paden y pafo,( 1 Corintionan 3:16-17) ( 2 Corintionan 6:14-18) y no manera tin hende ta defende nan mes bisando: Dios ta wak curason, y no apariencia, nos ta pertenece na Dios completamente y no cierto parti di nos curpa so.
Mescos cu E a salba nos completamente, curpa, alma y spirito asina tambe nos ta pertenece, completamente na Dios.
Hesus a bisa; Tene cuidao, y warda boso di tur golosidad, pasobra bida di hende no ta consisti di e abundancia di e cosnan cu e tin.( Lucas 12;15).
Ningun poder, ningun nivel of gremio,ningun amistad ,ningun montante di placa, por cumpra e caminda pa e Gloria di Dios. Hesus Cristo ta e unico caminda di e berdad y e bida.
Ta imposibel pa mescla cu mundo y cosnan di mundo y bisa cu nos ta traha pa Dios,laga nos mantene nos mes puro manera Salmo 1:1-3 ta bisa.
No stima e mundo, ni e cosnan cu tin den mundo, Si un hende ta stima mundo. E amor di e Tata no ta den dje. Pasobra tur loke cu tin den e mundo,, e deseo di carni,y e deseo di wowo y e orguyo di bida,no ta bin di e Tata, sino di e mundo. E mundo ta pasa bay, y su deseonan tambe,ma esun cu ta haci boluntad di Dios ta permanece pa semper.( 1 Juan 2:15-17)
Anhelo pa yega na poder, anhelo pa tin cosnan di mundo, anhelo pa fama,tur ta anhelo carnal, pasobra tur e cosnan ey ta temporal. Ta miho nos anhela pa conoce Dios y su presencia.
Si tur hende por djis corda cu ora nos muri, nos no ta bay cu nada, anto e ora ey tur curason haragan, lo fria, y busca arepentimento,y busca cara di Dios, pasobra solamente den Cristo Hesus nos tin bida eterna.
Un oracion grandi y sincero mester subi na cielo, pasobra e sistema di mundo ta purba drenta tur caminda, y hasta ta purba gara e fielnan, pasobra esey ta para scirbi,y nos tur sa cu e diabel ta e gran mentiroso y cu su plan ta solamente pa horta, pa mata y pa destrui, y e ta capas pa disfrasa na tur cos.
Laga nos mantene nos bista tur momento riba Dios, nos Señor y nos Salbador.
Sinceramente, Pastor Marcel Balootje
