Inmoralidad no ta nada di celebra, inmoralidad mester produci tristesa den ser humano, pasobra inmoralidad ta contra boluntad di Dios, y esnan cu ta bay contra boluntad di Dios, si nan no arepenti,
lo no hereda e reino di Dios.
Un tipo di inmoralidad, masha conoci mey mey di nos, cual ta uno hopi anticua , ta adulterio, den boca di pueblo mihor conoci como” Cortamento di orea).
Hopi hende ta kere cu adulterio ta amor, adulterio no ta amor , e ta wodo considera como un pasion baho y perverso, pasobra prome cu un hende adultera e mester envidia.
Ta envidia ta pone hende desea cos di otro hende, pasobra for di ora un hende desea un persona cu no ta su casa , siendo cu e mes ta casa e ta comete adulterio cual ta un pica, aunke awendia tin mil y un tipo di defensa pa aproba inmoralidad.
A keda proba cu hopi biaha hende ta envidia bida matrimonial di otro, y ta purba drenta bao di caba di amor of un persona cu ta soluciona problema amoroso, pero cu ta termina den destruyendo tur cos, matrimonio, cas , famia etc.
Ningun relacion adultero no ta aproba pa Dios, pero e ta keda un relacion di berguensa, sin respet, cu ta expresa falsedad entre pareha, y hopi biaha ta causa di violencia y maltrato.
Adulterio su victima no ta solamente un matrimonio kibra, pero tambe ta produci yuinan desampara, kende nan bida ta cambia den trauma y depresion, pasobra nan a perde amor di nan mayor.
Inmoralidad no ta cos di broma cune, ni tampoco gaba, pasobra inmoralidad ta bobedad,y tur inmoral ta wordo husga door di Dios.
Laga nos comporta nos mes decentemente manera den dia, no den parandiamento,y den burcheria,no den inmoralidad sexual y den sensualidad , no den pleito,y envidia. Ma bisti boso cu Señor Hesus Cristo y no haci provision pa e carni, pa cumpli cu su mal deseonan.( Romanonan 3:13-14).
Ta imposibel pa hende, comete inmoralidad y despues celebra, den esey nos ta descubri cu no tin temor di Dios, y cu e enemigo a tuma e bida over den profundo scuridad.
Ta pesey awendia nos tin cu haci hopi oracion pa nos yuinan, y pa hubentud, pasobra segun ciencia y technologia ta aumenta , maldad y inmoralidad tambe ta aumenta, y e prome nan cu ta wordo influencia ta nos muchanan.
Huy for di inmoralidad.Tur otro pica cu un hende comete ta pafo di e curpa, ma e hende inmoral ta peca contra su mes curpa.Of boso no sa , cu boso curpa ta tempel di Spirito Santo, kende ta den boso, . Kende boso tin di Dios,y cu boso no ta pertenece na boso mes. Pasobra boso a wordo cumpra pa un preis, pesey glorifica Dios den boso curpa.( 1 Corintionan 6:18-20).
Aunke tin ley cu ta aproba inmoralidad y abominacion toch dilanti di Dios e ta keda un pica , cual hende mester arepenti di dje y biba un bida cu ta agrada Dios.
Adulterio ta kibra pas di hende cu hende, y tambe pas cu Dios, pasobra locual Dios a uni no laga hende separa.
E mundo ta envolvi den scuridad profundo, pesey nos no mester tene berguensa di predica e evangelio di e reino di Dios, na tur hende pasobra mientras cu nos ta keda keto miyones ta bay perdi tur dia pa falta di conocemento di e palabra di Dios.
Dios tene misericordia, pasobra tin hende ta gaña ciego y sordo pa nan no arepenti y sali for di scuridad.
Sinceramente, Pastor Marcel Balootje
